محمدالله صافی
د بحث د پیل په موخه، دوه سواله را مینځته کول اړین دي
ـ د شوروي لښکرو «حضور» په افغانستان کې د جهادي مشرانو، عالمانو، پیرصاحبانو له خوا «اشغال» وبلل شو، د ح د خ ا دولت کافر وګڼل شو او د جهاد فتواوې ورکړشوې، نو ولې د امریکې د لښکرو «حضور» د هماغه جهادي مبارکو شخصیتونو له خوا مرسته وبلل شوه او لا نظامي تړون يې هم ورسره امضا کړ؟
ـ د طالبانو مشران او د پاکستان جماعت العلما وايي چه افغانستان د امریکې له خوا «اشغال» دی، دولت ګوډاګی او کافر دی او جهاد فرض دی، نو ولې بیا د افغانستان د علماوو شورا او مقدس، پخواني جهادي عالمان د دې حکمونو پخلی نه کوي او امریکایان دوستان بولي؟ سپړنه (شرحه)
د زبرځواکونو، د پیړیو پیړیو ناوړه خاصیتونو څخه، د ستراتیژیکو، سیاسي، نظامي، اقتصادي پلانونو د پلي کولو په موخه نوروهیوادو ته لښکرې استول او نظامي هډې ځای په ځای کول دي. خو هر نفوذ او تیری په کوم هیواد کې، د رقیب هیوادونو له خوا د غښتلي تبلیغاتي غبرګون سره مخامخ کیږي.
د بیلګې به توګه، د شوروي په مقابله کې پاکستان، امریکې او سلو نورو هیوادو د آزادۍ او د اسلام د شعارونو سره خورا قوي تبلیغاتي کمپاین پیل کړ. د جنګ مدیریت د امریکې سي آی اې او پاکستان د آی اس آی په لاس کې وو، د تبلیغاتو لارښوونې اود جهاد فتواوې د پاکستان جماعت العلما او د ایران اخوندانو ورکولې. د مجاهدینو مشرانو د «وطن اشغال دی» او «اسلام په خطرکې دی» د شعارونو په مرسته، چه د افغانانو دپاره عنعنوي او عقیدوي ارزښت لري، د خلکو ملاتړ ترلاسه کړ.
په دې ډول د «اشغال» کلمه د پاکستان د دولت له خوا د یوې اغیزناکې تبلیغاتي وسیلې په توګه وکارول شوه! د پاکستان تبلیغات فی سبیل الله نه وو. د آی اس آی جنرالان ملیونران شول، پاکستان آباد شو. په مقابل کې، افغانی دولت مات شو، ولس دیو جنګي دوزخ نه بل ته غوځار شو.
راوروسته اولس کلوکې، چه امریکا زمونږ خاورې ته لښکرې راوستې، خپلې هډې يې ځای په ځای کړې، پاکستان ډبل رول ولوبوی. د امریکې نه يې پیسې اخیستې چه د تروریزم سره مبارزه کوي، او طالب جنګیالیو ته يې وسلې، پناه ځای، قوي تبلیغات او انتحاري برابرول. دا چه د اوباما اداره، په پټه کې په دې لوبه کې ورسره شریکه وه که نه؟ دا جلا بحث دی، خو د پاکستان د تبلیغاتو پخوانی ماشین بیا فعال شو او په افغاني دولت باندې يې د «اشغال » د مزدورانو او دکفر تورونه ، لکه څلویښت کاله پخوا، ولږول . د پاکستان د جماعت العلما مبلغانو، د هند دیوبند مدرسې او د مصرجامع الازهر د اسلامي مرکز شاګردانو د اشغال ضد مبارزه او د مقدس جهاد فتواوې اوچته کړې. زمونږ خوار ولس، چه د مجاهد مشرانو، د ظلم، غصب او لوټماریو څخه په تنګ راغلي وو، او د امریکایانو ړندو بمباریو دردولي وو، را وپاریدل، د کلیو او بانډو خلک د طالبانو ملا تړلي شول.
اوس، د سولې پرسر، د پاکستان نوې تجارت پیل شوی. د سولې مذاکراتو ته « د طالبانو حاضرول»، پاکستان د پاره د نوو مالي مرستو او د نړیوال صندوق ملیاردونو ډالرکریدیت ته لیاره خلاصوي. د«طالبانو د حاضرولو» لوړه، د پنجابي چارواکو سره د طالبانو تړاو ثابتوي. هیله ده، چه مکرمو طالبانو د پاکستان سره، د جمهوررییس رباني په شان، پټ ملا ماتونکی قراردادونه نه وي امضا کړی!
په پای کې درنو افغاني روښان اندو، لیکوالو ته په درنښت وړاندیزکیږي، چه په خپلو څیړنو کې د پاکستان ناولي نیتونه او غرضي پلانونه د پامه ونه غورځوي. م.صافی. ۲۹/۱۱/۱۳۹۷ (۱۸/۲/۲۰۱۹)