دافغانستان ملي ترقي گوند دارالنشا اعلامېه

کابل – افغانستان

د ۱۳۹۸ م د سلواغې ۲۹ مه

 ◦ د افغانستان د  ملي ترقۍګوند په خوښۍ خبرتیا تر لاسه کړه چې د افغانستان د ولسمشرۍ ټاکنو کې دولت ساز ټيم ، د افغانستان د ټاکنو د خپلواک کمیسیون له لورې د نهایي پایلو د اعلان له مخې  محمد اشرف غنې د دویم ځل له پاره د افغانستان د اسلامې جمهوریت د ولسمشر په توګه وټاکل شو .

زموږ ګوند چې د ګوندي غړو ، کادرونو او مشرتابه په شریکه پریکړه د دولت ساز ټيم ملاتړ کړی ویاړې چې د هېواد ستونزمنو حالاتو ته په کتو ، د سولي د روان بهیر د اړین مدیریت ، د دفاعې او امنیتې ځواکونو د پياوړي کولو ، په خپلو زیرمو د هېواد د متکې کېدو او په ټوله کې د افغان ولس په ګټه ، د ټاکنیزو ټيمونو له مینځه دولت ساز ټيم په سر کې محمد اشرف غنې د ملاتړ وړ  ګڼلی دی .

که څه هم چې د افغانستان خلکو په خورا پيچلو شرایطو کې د ولسمشرۍ د نوماندانو صندقونو ته د رایې اچونې زړه ښه کړ ، مرګ ژوبله یي په ځانونو منلې ، خو د یو شمیر کړیو او عناصرو د دموکراتیک ضد چلند ، د ټاکنیزو کمیسیونونو د یو لړ غیر مسلکې برخوردونو له وجې د ټاکنو پایلې په خپل وخت اعلان نه شوي ، په خلکو کې د شک او ویرې د پيداکولو هڅې وشوي ، بهرنیو څرګندو کړیو د یو شمیر عناصرو د تشویقولو په ترځ کې د افغانستان د خلکو د ملي يووالي او جغرافیې د کمزورې کولو او ماتولو ګواښونه وکړل ، خو د هېواد د خلکو ، سیاسي مدني وطنپالونکو ټولنو ، ملي وطنې شخصیتونو د زور اچونې په پایله کې د افغانستان د ټاکنو او ټاکنیزو شکایتونو خپلواکو کمیسیونونو د ولسمشرۍ ټاکنو د وروستیو نتایجو د اعلانولو پریکړه پلې کړه .

د ګوند د دارالانشأ له نظره ، اړتیا ده چې د پایلو د اعلان اخستل شوی ګام ملاتړ وشي ، ملت په تیره بیا وطنپالونکې روڼ اندې د افغاني تنکۍ دموکراسۍ د نهادینه کولو ، د هېواد بیا جوړولو ، قانون پلې کولو ، د ښاروندې په ځانګړي ډول د ښځو حقوقو د خوندې ساتلو د فساد د ټولو بڼو پر ضد مبارزې کولو او د سولي د روان بهیر د بریالې کولو له پاره مټې رابډ وهل شي .

همدارنګه نړیواله ټولنه ، د افغانانو د دموکراتیکو ارزښتونو د ساتلو اخلاقې مرستې او د هېواد د بیا جوړونې په کار کې مثمرو  همکاریو کولو ته هڅول کیږي .

د ګوند دارالانشأ هغه سیالو ټيمونو څخه چې په ټاکنیزو سیالیو کې  بریالي نه شول، غوښتنه کوي، چې د افغانستان د اساسي قانون ، د ټاکنیزو کمیسیونونو د لوایحو او پریکړو له مخې د وروستیو  پایلو منل ونه ځنډوي او له هغه حرکتونو او غبرګونونو څرګندولو ډډه وکړي چې هېواد د بحران په لور بیایي .

عبدالحی مالک

 د افغانستان د ملي ترقۍ ګوند ریس

 

دا لاندی څو بیتونه د افغان پښتون وطن دفقیر ولی دشهیر مشر منظور پښتون ملی او وطنی جد او جهد ته تقدیم شویدی

هنر غيرت
** شعر **

دعلی ، داوړ همزولیه! ای رستمه ای سهرابه

د ایپی فقیر بچیه ای شاهینه ای عقابه

ای دخړ کمر فریاده د پښتون وطن شبابه

دارمان لوڼی کتابه د پنجاب سره حسابه

ایمل خانه دریاخانه دخټکو خوشالخانه

دګرګین سره په جنګ کی مکناټن ته اکبرخانه

دکنړ میرزمان خانه د ځدراڼو ببرک خانه

صمد خانه  باچاخانه د پښتون وطن اسمانه

تر اوسلو یی شرنګهار راغی ستا لاسو کی زولنی دی

ځینځیرونه  اتکړی دی ارادی دی پښتنی دی

ته منظوریی ته پختون یی ته پښتون ته  ژوندون غواړی

ته پښتون ته سکون غواړی ته پښتون ته بدلون غواړی

هندوکش درته ولاړ دی شمشاد دنګ درته ولاړ دی

چی په ننګ درته ولاړ دی دکابل د پاره ویاړ دی

دمزدور دپاره ویاړ یی د پاچا دپاره ویاړ یی

دخیبر دپاره ویاړ یی پختونخوا لپاره ویاړ یی

ته منظور مونږته منظوریی             ته مو هوډ د وروستی جنګ یی

ته میړانه ته غرور یی د میوند د ډګر ننګ یی

 

افغانانو ته د جـــــــو بايدن له توهينـه ډکي څرګند‎

   افغانانو ته د جـــــــو بايدن  له توهينـه ډکي څرګندوني او د افغانستان د بيا ويشلو تــوطـئي :

   ليکنه : اميرګران 

د امريکا د متحده ايالاتو د جمهور رئيس اوباما پخواني مرستيال جو بايدن د ديپلوماتيکو نزاکتونو او خپل منځي سياسي اړيکو خلاف ويلي چي : ( افغانان به هيڅکله يو موټي او افغانستان به يو هيواد او واحد ملت نه شي ) ، د افغانستان سره د کرکي لرلو له کبله جو بايدن پخوا هم داسي غيرواقعي او غيرمسؤلانه اظهارات کړي د بيلګي په توګه نوموړي حامد کرزي ته په خپلو خبرو کي په عصبانيت ويلي چي ” افغانستان بايد خپله خارجي پاليسي د پاکستان د سياستونو تابع وګرزوي ” ،

د تاريخ پوهانو له قوله د افغانستان او امريکا لومړني ديپلوماتيک تماس د غازي امان الله خان د پاچاهۍ په وخت کي په ۱۹۲۲ م کال ونيول شو ، او په همدغه نيټه محمدولي خان دروازي امريکا ته د خپل سفر په ترڅ کي د اميرامان الله خان مکتوب د امريکا جمهور رئيس هارډينګ  ته وسپاره ، د افغانستان پاچا په خپل مکتوب کي له امريکا سره د دوه اړخيزو دوستانه مناسباتو او همکاري غوښتنه کړي وه ولي امريکا د خپلو ختيځ پيږندونکو له هغي جملي د ،

والاش سميت موراي ) د منفي نظر له مخي او هم په دي دليل چي افغانستان ئي د انــګريز د امپريل ښکيلاک د نفوذ سيمه پيږندله د همکارۍ لپاره دومره زړه ښه نکړ ، وروسته بيا د شاه محمود خان صدراعظم او ورپسي د سردار محمد داود خان د صدراعظمۍ په وخت کي له امريکا سره د ټينګو او دوامداره اړيکو د ايجاد هڅو کومه مثبته نتيجه ورنکړه ، امريکا هغه مهال پاکستان او ايران عملآ ترخپل نفوذ لاندي راوړل او د سياتو او سينتو په پکتونو کي ورګډ کړل ، او په ۱۹۵۴ م کال ئي د ډيورند تحميلي کرښه د افغانستان او پاکستان په منځ کي سرحد ومانه ،

همداډول د افغانستان د ورانولو جهادي او طالبي پروژي د دوي د کښت ميوه ده ، په دغه اړوند د شوروي اتحاد پخواني جمهور رئيس ميخائيل ګورباچف په ۲۰۰۹ م کال په خپله مصاحبه کي چي د فرانسي له مشهوري ورځپاڼي. ( فــيګارو ) سره ئي کړي ويلي ول چي ( د نړۍ په کچه موجود ترهګر د امريکا لخوا پيدا شوي ، روزل شوي او اوس امريکا د همدغو ترهګرو د کښت حاصل په افغانستان کي ټولوي ) ، همدا ډول دوي ول چي د بـــن د توافقاتو له مخي ئي د شمالي ټلوالي او ځينو جهادي کړيو د حکومت خام بنسټ کيښود چي تر اوسه په افغانستان کي خونړي تراژيدي دوام لري ، جــو بــايدن بايد پوه شي چي د افغانستان د وران ويجاړ حالت او جګړو لامل بهرنۍ مداخلي او تجاوز دي چي له څلورو لسيزو په زياته موده کي تر دا مهاله دوام لري ، پاکستاني حاکم اشرافيت او ځينو نورو هيوادو زموږ د هيواد په ضد نااعلان سوي جګړه جاري ساتلي او افغانان هره ورځ تلفات ورکوي ، د افغانستان د اکثريت روشنفکري بهير او حقيقت پالو له نظره په افغانستان کي د نيابتي جګړو دوام د بهرني او ګاونډي هيوادو د دولتونو او استخباراتي کړيو د بربنډو مداخلو پايلي دي ، له جو بايدن ، امريکا ، ناتو او جهاني ټولني څخه پوښتنه کوو چي ستاسو هغه وعدي تکميلي شوي يا خير ؟ ؟ چي ويلي مو ول په افغانستان کي به د ملت جوړوني او دولت جوړوني له پروسي سره مرسته کوي او افغانستان به په سيمه کي د دموکراسۍ بيلګه او ” ايشين ټايګر “

جوړوي ، بياهم سوال کيږي چي ولي پورتني اهداف نه دي تکميل ، ولي جګړه تر اوسه دوام لري ؟ دا ځکه چي د تروريزم په ضد مبارزه کي د تروريستانو اصلي ځالي او پټ ځايونه چي هغه په پاکستان کي دي تر بريد نه دي راغلي او په ښکاره د ” سيوري جګړه ” له هغو قرارګاوو زموږ په هيواد کي جاري ده او په عوض کي د تاسو د جمهور رئيس ټرمپ په قول ۳۲ مليارده امريکائي ډالر کومکونه ئي  تر لاسه کړي ، د افسوس وړ خبره داده چي همدا اوس يوځل بيا د افغانستان د کړکيچ د حل لاري د پاکستان د پوځي استبلشمنټ د دوکتورينو په چوکاټ کي لټول کيږي د افغانستان سره خپل منځي تعهد او ستراتيژيک پارټنرشيپ له پامه غورځوئ ،

دلته يوځل بيا د تاريخ پاڼو ته ورګرځو هغه دا چي په ۱۳۴۰ هـ ش لسيزه کي د امريکا د جمهور رئيس ريچارد نيکسن مرستيال ، سپيرو اګنيو  کابل ته په رسمي سفر راغلي وو ، نوموړي افغانانو ته په خپلو خبرو کي داسي ويلي ول ( افغانستان يو لرغوني ملت دي او نه يواځي اوږد تاريخ لري بلکه د لويو ملي ارادو له وياړه ډکي خاطري هم لري ، اګنيو زياته کړه چي د امريکي بابا جورج واشنګټن لا ۱۵ کلن ځوان وو چي احمدشاه بابا په افغانستان کي د امريکا انقلاب ته ورته انقلاب راوستلي وو ) امريکايان پخپله خوله وائي چي ” افغانان د ملي انقلاب په راوستلو کي له امريکاڅخه وړاندي دي ” جو بايدن دي په غور سره د ۱۹۶۹ــ۱۹۷۳ کلونو د سپيرو اګنيو فايلونه وګوري او د افغانانو په هکله دي قضاوت وکړي ،

د جو بايدن له توهين اميزه څرګندونو چي تير شو پخوا هم د افغانستان د بيا ويشلو ياني په جنوب او شمال او يا په اتو زونونو او ياهم د ديکتاتور ضياء الحق د کنفدراسيون دوکتورين چي د تنظيمي ډلو په وساطت ئي عملي کاوه هغه توطئي دي چي د افغانستان په اړوند پلان شوي ولي له ناکامۍ سره مخامخ دي ، د يادولو وړ ده چي په ۲۰۱۰ م کال د برتانيا د نړيوالو ستراتيژيکو څيړنو مرکز ( IISS ) په خپله کلنۍ څيړنه کي د افغانستان په شمال او جنوب د ويشلو نظر ورکړي وو او بيا د همدغه هيواد د دفاع وزير ليام فاکس هم ، په اتــو ساحو يا زونونو د تقسيم وړانديز کړي ، په دغه اړوند د امريکا د بليک واټر د اجرائيوي مدير اريک پرينس او پخواني سفير رابرت بليک ويل ورته نظرونه هم د ډله ايزي ميډيا له لاري افشاء سوي ، هيره دي نه وي چي د افغانستان د تجزئي او د واحدملت د نه جوړولو توطئي او طرحي له ۱۷۰۹م هغه مهال چي ميرويس نيکه په قندهار او هرات کي د صفويانو ۱۵۰ کلنه اداره پاي ته ورسوله تر اوسه پوري ليدل کيږي ، خو افغانان به د پخوا په څير واحد او يو ملت پاتي شي او د ليري او نږدي توطئــه کوونکو پټي او لوڅي طرحي به ناکامه کړي .

 

د افغانستان د ملي ترقۍ ګوند د دارالانشأ اعلامیه

کابل – افغانستان

د ۱۳۹۸ کال د سلواغې ۱۸ مه

د ګوند دارالانشأ په ډيره خواشینۍ خبرتیا تر لاسه کړه چې د پيژندل شوي سیاستوال او د افغانستان د ملي دفاع وزارت د پخوانې ویاند تورنجرال محترم دولت وزیري مور بې بې چې ، مهربانه میرمن وه او کشر ورور  سیف الله چې ، د خوګیاڼو شورا د مهمو مشرانو له جملې څخه ؤ دواړو ځانونه حق ته سپارلې دي .

انا لله و انا الیه راجعون

محترم وزیري چې د یوه وتلې ملي سیاستوال په توګه تل د هېواد په ملي سترو مسألو کې څرګند او وطنپالونکی دریځ خپل کړی او د افغانستان د ترقۍ ملي ګوند هر وخت د هغه د روښانه دریځ ستاینه کړي ، نن د خپلې مرحومې مور بې بې او د خپل خداي بښلې ورور د ناببره مړینې له امله د کورنۍ د غړو او خپلوانو سره د غم په تغر ناست دی .

دا شیبه د وزیري صاحب او د هغه د دردمنې کورنۍ له پاره سخته او د نه هیریدلو لحظه ده .

د ګوند دارالانشأ د محترم دولت وزیري او د هغه د ورور سیف الله سیاسي ، ټولنیزو او خیر غوښتونکو هلو ځلو ته د قدر په سترګه کتلې او ګوري او له دې امله ، د وزیري صاحب د مور بې بې او مرحوم ورور د مغفرت له پاره د الله تعالی دربار ته د دوعا او بښنې لاسونه لپه کوي .

دارالانشأ په داسې حال کې چې د مرحومینو مړینه نه جبران کېدونکې او بې وخته ضایعه بولي ، خداي ج ته خواست کوي چې د متوفا برکتونه د وزیري صاحب د کورنیو په غړو کیږدي او ورته عوضونه ورکړي .

د دومره ستر غم په پيښيدو سره موږ ټول د وزیري صاحب او د هغه د کورنۍ تر څنګ ودریږو چې د مهربان خداي له خوا په هغه او کورنۍ فضل وکړي او رسیدلی درد اسانه شي .

په پاي کې یو ځلې بیا مرحومینو ته د مغفرت او وزیري صاحب او کورنۍ ته یي د زړه د صبر او د  عاجل تسلیت دوعا کوو .

امین

عبدالحی مالک    د افغانستان د ملي ترقۍ ګوند ریس

 

د افغانستان د ملي ترقۍ ګوند د دارالانشأ اعلامیه

کابل – افغانستان

د ۱۳۹۸ م د سلواغي ۸ مه

د افغانستان د ملي ترقۍ ګوند دارالانشأ په خیبر پشتونخوا کې ، د پښتون ژغورني غورځنګ مشر منظور پښتین د غیر قانوني نیوني او تښتوني په وړاندي کلکه اندیښنه ښيي او د پاکستان پولیسو او استخباراتو دا غلچکی او ډارن عمل په سختو ټکو غندي !

منظور پښتین په پاکستان او سیمه کې د بیان د ازادۍ ، د انساني حقوقو د ورکړي او په مرموز ډول د پښتونخوا د اګاه قشر د وتلو سیاستوالو ، دیني عالمانو ، فرهنګیانو ، د قوم مشرانو او د پشتون ژغورني غورځنګ د غړو او مینه والو د بې درکه کېدو او وژل کېدو د مخنیوي له پاره د سوله ایزي مبارزي بیرغ رپاند ساتلی دی .

د غورځنګ د پيل له ورځې څخه تر اوسه په منظور پښتین او ملګرو یې د پاکستان د پوځ او استخباراتو له خوا زیات تورنه لګول شوي ، د غورځنګ فعالان نیول شوي ، په بیلابیلو پلمو د هغوي لاري ډپ شوي او په شهادت رسول شوي دي .

د غورځنګ نور مشران لکه محسن داوړ او علي وزیر چې پارلماني مصؤنیت لري هم د پاکستاني پوځ د زورونو او نیونو له توطيو څخه بچ پاتې شوي نه دي ، تر یوي مودي زندانې او کړول شوي .

د پې ټې ایم د مشر منظور پښتین د غیر قانوني نیوني له امله په ټول پاکستان ، پښتونخوا او نړۍ کې د اعتراضونو د کولو ، د سترو غونډو جوړولو او پراخو لاریونونو را ایستلو لړۍ په بې ساري ډول پيل شوي .

د نړیوالي بښني عمومي سازمان ، د افغانستان او نړۍ د یو شمیر لارښوونکو څخه نیولي بیا ټول سوله خوښوونکی بشریت د منظور پښتین نیول او تښتول په غټو ټکو غندي او د هغه د بې له ځنډه خوشي کېدو جدي غوښتنه کوي .

د ګوند دارالانشأ د هېواد ، د سیمي او نړۍ په سوله خوښي بشریت ، مدني سیاسي ټولنو ، خپلواکو شخصیتونو غږ کوي چې د پاکستان په پوځي او استخباراتي کړیو زور واچوي چې منظور پښتین او د هغه نور نیول شوي ملګري روغ رمټ له زندانونو ازاد کړي او له دې وروسته د ستم لاندي ولسونو په تیره بیا پښتنو د سوله ایزو مبارزو د روان بهیر په وړاندي خنډونه جوړ نه کړي .

په درناوي

عبدالحی مالک

د افغانستان د ملي ترقۍ ګوند ریس