کابل – افغانستان

د ۱۳۹۷ م د کب ۲ مه

د افغانستان د سولي پيل شوي بهیر د سالمي سمت نیونې په هکله :

په افغانستان کې د جګړي د بندیدو او د سر تا سري سولي د تأمین په موخه د سولي پيل شوی بهیر نیکه هڅه ده چې هېوادوال ورته د امیدوارۍ په سترګه ګوري او له هغې ملاتړ کوي . د افغانستان د ملي ترقۍګوند هم د سولي د روان بهیر څخه د ملاتړ تر څنګ ، د بهیر د سالمي سم نیونې په نیت ، د ګوند دارالانشأ د لیندۍ په ۱۱ مه ۱۳۹۷ م کال د سولي وړاندیزونه تصویب کړل چې په ګوندي او هېوادنیو رسنیو کې خپاره شول . موږ هیله درلودله چې د سولي بهیر کې اشتراک لرونکې خواوي به د پروسې د سلامتې له پاره د وړاندیزونو مهمې برخې په پام کې ونیسې او سوله او ثبات به د افغانستان د جنګ زپلو خلکو د ارمانونو سره سم هېواد ته راستنول کیږي خو داسې ونه شول ، ځکه :

•د سولي له پاره خبري طالبانو ، د طالبانو ملاتړو او د افغانستان په سوله کې یو شمیز اغیز لرونکو همسایه او نورو هېوادونو انحصار کړي .

•د جګړي اصلي قربانې ورکوونکې یانې د افغانستان خلک کنج ته ټيل وهل شول . همدارنګه د سیاسي مدني وطنپالونکو ټولنو د استازو برخه وسوځېده .

•د افغانستان حکومت چې د طالب سره د جګړي اساسي خوا ده په دې پلمه چې مشروعیت نه لري له نظر وغورځول شوه .

•د افغانستان د حکومت اپوزیسیون یو شمیر کړیو هوښيار چلن ونه کړ ، د طالب د تلې د درنولو په موخه یې د حکومت تر څنګ د پاتې کېدو پر ځاي په مستقیم او غیر مستقیم ‌‌‌‌‌‌ډول د طالب او د هغې د ملاتړو د موضعګیرۍ په پياوړې کولو بوخت پاتې شول .

دغې ویره اچونکې وضعې د افغانستان خلک په شک کې واچول ، له دې کبله خلکو ، سیاسي مدني وطنپالونکو ټولنو ، دیني عالمانو او په حکومت کې له حالاتو اګاه چارواکو کلک غبرګون وښود چې په پایله کې د سولي بهیر یو شمیر مرکچیان خپلو تیروتنو او د هغې فوري سمولو ته تر یوي کچې متوجې شول .

لکه چې د افغانستان د ملي ترقۍ ګوند دارالانشأ د سولي په تصویب شوي وړاندیزونو کې ورته اشاري کړي وي ، باید د سولي بهیر د پاتې برخې په ناستو کې زموږ وړاندیزونه او لاندي موارد د بهیر د سالمې سمت نیونې په موخه په نظر کې ونیول شي :

•سوله یوازي طالب او د هېواد دننه په واک کې شریک تنظيمونه ، نه شي کولی . باید په مرکچې پلاوي کې د افغانستان د خلکو ، سیاسي ، مدني وطنپالونکو ټولنو ، د ښځو او ځوانانو اعتبارې استازي اشتراک وکړي .

•جګړه د افغانستان په خاوره ادامه لري او د هغې تا‌ؤ افغانانو ته رارسې . له دې کبله د سولي د بهیر د مشرتابه او مالکیت امتیاز باید د افغانستان د حکومت سره وي نه له ګاوندیو او نورو هېوادونو سره . د بهیر د بریالې کېدو په هدف مرسته د افغانستان سره وشي نه له نورو هېوادونو سره .

•په هېواد کې باید د سر تاسري سولي تأمین ستره ستراتیژيکه موخه وګڼل شي ، دغې موخې ته د رسېدو په نیت ، حکومت ، اپوزیسیون ، سیاسي مدني وطنپالونکې ټولني او په ټوله کې خلک هر ‌‌‌‌‌‌ډول اختلافونه او ګټې یوي خوا ته کړي ، د سولي د تأمین په هدف یو بل ته لاسونه ورکړي او له واحدي موضع د طالبانو او د هغوي له ملاتړو سره په خبرو کې د افغانستان او د هغې د خلکو په ګټه د سولي بهیر په سالمه سمت نیونه کې برخه واخلې .

•هېوادوال وخت په وخت د خبرو له جریان څخه خبر کړل شي ، هغوي چې د ملي غوښتنو پر ځاي په فردي او ګروپې غوښتنو تاکېد کوي خلکو ته سم دم ور وپيژندل شي چې خپله خلک ورسره حساب وکړي .

د سولي د تأمین په ارزو

عبدالحی مالک   د افغانستان د ملي ترقۍ ګوند ریس