د همزولي صاحب له شعرون

 

هرچاته  ځان  خپله  هنداره  کې زمرى ښکاري

ځکه  عاقل  په  لېونو  کې  لېونى  ښکاري

تندى  کړې  ګونځې  په  غوسه  دې رانه مخ واړوې

ولې  مې  ګل  غوندې  نظر  درته   اغزى ښکاري

زه  لکه  لمر  خواته  درځم ته لکه ستورى تښتې

په  عادتونو  کې  دې  دا عادت   پردى  ښکاري hmzvli

لا  يې  دتورې  نه  چې  ستا  دوينو  وږم راځي

شهيده  ولسه  تاته   څنګه   سکنئ   ښکاري

د  ژوند  په  لار  يې  له اوياو  اړولى   قدم

همزولى  هسې  په  همزولو کې ځلمى ښکاري

 

د افغانستان ملي ترقۍ ګوند د دارالانشا د مبارکۍ پيغام

received_1915333445166354

کابل _ افغانستان

د ۱۳۹۹ کال د چنګاښ ۱۴ مه

د يو شمير همفکره دموکراتيکو وطنپالونکو ګوندونو او سازمانونو د يووالي هوکړي اړوند!

د ډيرې خوشالۍ ځاي دى چې د افغانستان يو شمير سياسي دموکراتيک وطنپالونکې ګوندونه او سازمانونه د يو لړ پرله پسې اړيکو نيولو او خبرو اترو کولو په پايله کې د ګوندي يووالي کولو په هوکړه موافق شول او د واحد ملي دموکرات ګوند جوړولو په لور د يو مقدار لنډمهالو کاري اسنادو په لاسليك کولو بريالي شول. د کورونا وبا د خپريدو او مرګ مير په شرايطو کې دا لاسته راوړنه د يووالي کوونکو خواؤ د استازو زړورتيا، وطنپالنه او د هېواد په کړکيچنو شرايطو کې د احساس لوړه کچه ښيي.

د افغانستان ملي ترقۍ ګوند دارالانشا د اخيستل شوي بريالي ګام له امله د ګوند ټولو غړو او د ګوندي يووالي د هوکړه کوونکو ټولو خواؤ او د هغوئ غړو او د افغانستان خلکو ته د زړه له کومې تودي مبارکۍ وړاندي کوي. هيله څرګندوي چې اوچت شوى ګام د برياليتوب تر وروستۍ پولي تعقيب او کلک شي.

د افغانستان ملي ترقۍ ګوند د جوړيدو له ورځې تر اوسه د ګوندي يووالي او جبهي جوړولو څو بريالۍ تجربې ازمايلي، برياوي يي تر لاسه کړي او د شاته تګ ترخه تجربه يي هم کړي ده. زموږ په نظر د هېواد په پيچلو سياسي پوځي اقتصادي اوسنيو شرايطو کې چې زورواکي، فساد خوښوونکې، مافيا او بهرني لاسوهونکې په يوه ليکه کې د افغانستان د لوړو ګټو په وړاندي ودريدلي، د هېواد خپلواکې، ملي واکمني او ځمکنۍ بشپړتيا ته يي خطرونه راولاړ کړي، د دموکراتيکو وطنپالونکو ګوندونو، سازمانونو، ګروپونو او شخصيتونو تر مينځ يووالى کول زيات اهميت پيداکوي.

زموږ ګوند همدغې اړتېا ته د ځواب وېلو په موخه د يو شمير همفکره هغو ګوندونو، سازمانونو چې د ګوندي يووالي د هوکړي فعالي خواوي دي، په راټوليدو او غونډو کې هدفمنده برخه اخېستې ده. له دې کبله په دې اړوند له خپل کار او په بهېر کې د شاملو ټولو خواؤ کار ته د ارزښت په سترګه ګورو او له هغې رضايت څرګندوو. د دې له پاره چې لاس ته راغلى برى له يوي خوا خوندي شي او له بلې خوا په سالم لوري وده وکړي، د خواؤ د فکري ګډي اډانې لا نور پوخوالي او په تشکيلاتي تبليغاتي ډګرونو کې د ناسالمو سياليو بشپړ مخنيوي ته ا ړتيا لېدل کيږي.

د افغانستان ملي ترقۍ ګوند دارالانشا باور لري، لکه څنګه چې د يووالي هوکړه ممکنه شوه، همدا ډول به د ګوندي يووالي پاته بهير د شاملو خواؤ د برابرو هڅو په برکت بشپړيږي او خلک به له موږ ټولو د يو واحد سراسري ګوند د جوړيدو او تکميل بختور خبر اوري.

موږ تر پايه په کلک تعهد مخته ځو، هر ډول زيار او تيريدنې ته چمتو يو.

د ګوندي يووالي د بريا او واحد ګوند د جوړيدو په هيله!

عبدالحى مالک

 د افغانستان ملي ترقۍ ګوند ريس

 

د افغانستان د ملي ترقي ګوند د اروپا شورا د مبارکۍ پيغام

د ۲۰۲۰ م جولای ۴ مه

په خوښي مو خبرتيا تر لاسه کړه چې د افغانستان په پلازمينه تاريخي  کاپل کې، چې د هېواد د ملي او وطنپالونکو غورځنګونو د رامينځ ته کېدو او ودې ځانګو ده، يو وارې بيا د جولای په درېيمه نيټه د افغانستان د ملي ترقي ، د افغانستان د ملي يووالي ګوندونو او څلورو نورو ملي وطنپرستو سياسي سازمانونو تر مينځ د واحد ګوند په نامه د ګوندي سازماني يووالي د بنسټ ډبره د ګډ هوکړه ليک او لنډمهاله نورو ګوندي اسنادو د موافقه کولو لاسليک وشو . د ګوند د اروپا شورا، اړوند ګوندي شوراګانې او ګوندي غړي، د پورته شوي ګام له امله زياته خوښي ښکاره کوي ، ګوندي مشرتابه ، د هغه غړو او په موافقه کې د شاملو ګوندونو او سازمانونو مشرانو او غړو ته تودې مبا رکۍ وړاندې کوي. هيله څرګندوي، چې پورته شوى ګام بري ته ورسول شي او د افغانستان په سياسي ډګر کې يو ريښتونى ملي ډموکرات ګوند راڅرګند شي.

زموږ ګران هېواد افغانستان کې روان ناورېن، له زغم او توان څخه پورته جګړې، په ځانګړي توګه د سولې کاواکه بهير چې د وطن ملي هوېت، لوړو ګټو او ملي ارزښتونو خوندي تابه ته يي خطر پيښ کړى او په دې اړوند د شته ګواښونو زياتوالي د خلکو انديښنې ډيرې کړي، د ملي ډموکراټو ځواکونو، ګوندونو، سازمانونو ، خپلواکو سياسي شخصيتونو ، ورسره په څنګ کې د مدني علمي ټولنو او څيرو يووالى او همغزي د هر بل وخت په پرتله اړين کړي.

له نيکه مرغه دغې اړتيا ته زموږ ګوند، نورو ډموکراتو او هېوادنيو ګوندونو او سازمانونو د يوه بې ساري نوښت په پايله کې مثبت ځواب ووايه او په افغانستان کې د واحد ملي ډموکراټ ګوند جوړولو ته په کلکه تيار  شول.

د ګوند د اروپا شورا ، اړوند ګوندي څانګې او ګوندي غړي له ګوندي مشرتابه کلک ملاتړ کوي او د واحد ګوند د جوړولو په ملي سياسي کار او فعاليت کې ګړندۍ برخه اخلي.

مخ په وړاندي د افغانستان د واحد ملي ډموکرات ګوند د جوړيدو په لور !

محمد اسماعيل غرنى  د ګوند د اروپا شورا مشر

 

دافغانستان ملي ترقي گوند د ډاډ گرېرنی پېغام

په ژورې خواشينۍ سره موخبر ترلاسه کړو چې زمونږ مبارز او همرزمه ملګري دهوایی ځواکونوپخوانی قوماندان ډګرجنرال قهرمان  عبدالوهاب وردګ میرمن دورپښې ناروغې له امله په حق رسېدلې ده.

انا لله و انا اليه راجعون

دافغانستان دملي ترقۍ ګوندد محترم ډګرجنرال قهرمان عبدالوهاب وردګ او د ده درنې کورنۍ سره  په دې ستر غم کې ځانونه شريک ګڼی او د پېښې له کبله ورته تسليت وړاندي کوو.

د لوي خداي ج له درباره څخه بي بي مرحومې ته فردوس جنت اوډګرجنرال قهرمان عبدالوهاب وردګ، د ده درنې کورنۍ او د مرحومې ټولو خپلوانو او دوستانو ته د زړه صبرجمیل غواړو۔

دافغانستان دملي ترقۍ ګوند

 دتبلغ اوفرهنګ کمیسیون.

د افغانستان حالاتو ته ځغلنده کتنه

نور محمد غفوری20117410_1612175422148826_1692773685_n

افغانستان همدا اوس په سختو جګړو کې اخته او يو ډیر بې امنه هیواد دی چې په ډیر پیچلي سیاسي، اقتصادي، ټولنیز او  کلتوري وضعیت کې قرار لري. د افغاني ټولنې هر اړخ او ټول سکټورونه له ستونځو او بحران سره مخامخ دي. روان کړکیچ هم د افغانستان ټول خلک، ګاونډي هیوادونه، سیمه، نړیواله ټولنه او د اوسني دولت بین المللی پارتنران په تشویش کې اچولي او بحران هومره ژور او هر اړخیز دی چې په کوچنۍ لیکنه کښې یې په ټولو ابعادو رڼا نه شي اچول کیدای.

د افغانستان د بحران په سیاسي، اقتصادي، ټولنیز او کلتوري اړخ باندې یو ځای خبرې کول او په یوه مقاله کې په کامپلکسي ډَول یو له بله سره په تړلې توګه د موضوع څیړنه لوستونکو او په تیره بیا هغو ځوانانو ته چې په ۲۰۰۱ کال کې زیږیدلی، یا یې تر پنځلسو کالونو ټیټ عمر لاره او په دې موده کې یې په دې اړه ځانګړې پلټنې هم نه دي کړېِ؛ د پیښو جزیات او د هغو د ودې او تکامل د بهیر واضح تصویر په لاس نه شي ورکولای. له وطنپالو ځوانانو او د سیاست له مینه والو سره د خبرو اترو په جریان کې مې ددې اړتیا ولیده چې په دې هکله د ټولو لوستونکو له پاره د پوهې وړ لنډه، خو د ټولو له پاره د فهم وړ تاریخي- تحلیلي لیکنه وړاندې شي. زما له نظره ښه داده چې د افغاني ټولنې په هره غوره برخه، لکه سیاسی سکټور، اقتصادي سکټور، اجتماعی او ټولنیز سکټور، جدا جدا تاریخي تحلیل وړاندې شي، تر څو چې لوستونکي په هره برخه کې د حالاتو تاریخي مبدأ و پيژني او د پدیدو او پروسو اساسي تکاملي کرښه تعقیب کړای شي.

سیاسي نظام او د افغانستان د اوسني سیاسی نظام تاریخی شالید:

  • سیاسي نظام او د هغه اجزاوې: په لنډه توګه ویلای شو چې سیاسی نظام په معین هیواد کې د انسانانو تر منځ هغه اړیکې په غیږ کې نیسي چې د دولتی چارو په ډول او سمون پورې اړه ولري. دلته دا موضوع طرحه کیږي چې د سیاسي ځواک په سر کې څوک، کومه ډله او کوم ګوند ځای ونیسي او د کومو موخو له پاره کار وکړي، د هیواد چارې څنګه مدیریت کړي او دولت په اقتصادی، ټولنیزو او کلتوري چارو کې څنګه موقف او اغیز ولري. د همداسې یو له بله سره متفاوتو نظرونو پر بنسټ مختلف سیاسي ګوندونه رامنځته کیږي.

عصری سیاسی نظام د هیواد د عامو چارو د سمون له پاره اساسي قانون لري او د هغو په چوکاټ کې بیا په هیواد کې د ټولنیزو اړیکو د هرې فرعي څانګې د سمون له پاره نور قوانین جوړیږي.

د عصري سیاسي نظام غوره جوړوونکی برخې دولت او سیاسي ګوندونه دي چې دولت پخپله درې غوره برخې، مقننه قوه (پارلمان) اجرائیه قوه (حکومت) او قضائیه قوه (ستره محکمه) لري. سیاسي ګوندونه په عصری سیاسی نظام کې د خلکو د سیاسي ارادې په جوړولو، د ټولنیز شعور په لوړولو او د ولس د تودو او دولت تر منځ د پلونو او اړیکو د جوړولو رول لوبوي. مطبوعات هم د ملت د ارادې په تشکل او جوړونه کې غوره رول لوبوي.

  • د افغانستان د اوسني سیاسی نظام تاریخی شالید: د افغانستان د اوسني سیاسي نظام د بنسټ ډبره په ۲۰۰۱ کال کې په جرمني کې د بُن د کنفرانس لخوا کيښودل شوه.

کله چې په ۲۰۰۱ م کال کې د نیویارک جوړه تجارتی برجونه د سپتمر د میاشتې په یوولسمه نېټه په یوه هوایی تروریستی برید کې ونړيدل او د پنتاګون ماڼۍ زیان ولید، داسې و انګیرل شوه چې دا تروریستی بریدونه د القاعدې د تروریستي شبکې د مشر اسامه  بن لادن لخوا تنظیم شوي. ولسمشر بوش په امریکا کې جګړه ایز وضعیت اعلان کړ، ویې ویل چې د ناتو ټول هیوادونه د تړون د قرارداد له مخې مکلف دی چې په دې جنګ کې ورسره ملګرتیا وکړي. د تجارتي برجونو نړول یې پر امریکا پوځي حمله او د ناتو غړي هیوادونه یې د امریکا په ننګه مکلف وبلل.

اسامه بن لادن چې د شلمې پیړۍ په اتمه لسیزه کې د مجاهدینو د مرستې له پاره افغانستان ته راغلی و، په دې وخت کې په افغانستان کې اوسیده. د ۲۰۰۱ کال د سپتمبر د پيښې په درشل کې د افغانستان د ځمکې په سلو کې تر نوي (۹۰) زیاته برخه د طالبانو په اختیار کې او پاته د برهان الدین رباني تر مشرۍ لاندې حکومت تر ولکې لاندې وه. د القاعدې مشر اسامه بن لادن د طالبانو تر اغیزې لاندې ساحه کې په افغانستان کې اوسیده. طالبانو سره ددې چې د افغانستان په ډیره جغرافیایي ساحه او د افغانستان د نفوسو پر اکثریت حاکمیت کاوه، خو دولت یې یوازې د پاکستان، سعودی عربستان او قطر لخوا په رسمیت پیژندل شوی و. نورو هیوادونو د دوی دولت په رسمیت نه پيژاند. په ملګرو ملتونو کې د افغانستان چوکۍ هم د برهان الدین ربانی د حکومت له استازي سره وه.

لنډه دا چې امریکا ددې پیښې د غچ اخیستلو په خاطر په افغانستان کې د بن لادن د شتون او ښکار کولو له کبله د انګلیس په ملګرتیا په افغانستان نظامی یرغل وکړ، د طالبانو رژیم یې ړنګ کړ. د هغوی تر یرغل وروسته د څو ورځو په اوږدو کې ملګرو ملتونو د افغانستان د موضوع په اړه پریکړه وکړه او په افغانستان کې یې د دولت او نظام د جوړولو دنده پخپله غاړه واخیسته.

له دې پریکړې سره بې له ځنډه د نړیوالې ټولنې لخوا موضوع داسې واوښته چې په افغانستان کې دولت نشته او یا افغانستان د مشروع قوی مرکزي دولت او منظم سیاسی انتظام له کمبود سره مخامخ دی. څرنګه چې د ملګرو ملتونو له دندو څخه یوه دا هم ده چې له هغو هیوادونو سره د سیاسی نظام او مدرن دولت په راجوړولو او غښتلتیا کې مرسته کوي، کوم چې دولتی سیستم یې له کاره لویدلی او یا ضعیف او ناکاره دولتونه ولري او د داسې ناکاره ، ناکام او ضعیف دولت شتون د همغه هیواد د خلکو د ځان او شتمنیو مصئونیت نه شی نیولای، خلک یې پخپل منځ کې په جګړو اخته وي، د کار موندنې، د ژوند د معیشت د تأمین او  د ټولنیز پرمختګ شرایط نه شی ورته برابرولای. په معین هیواد کې د کارنده دولت نه شتون او یا د داسې ضعیف دولت موجودیت چې پخپله ټولنه کې حکم ونه شی چلولای، د بې نظمیو او انارشۍ مخه ونه شی نیولای؛ کیدای شی چې د سیمې او نړۍ له پاره د خطر او نا آرامۍ منبع شي. نو ځکه باید د ملګرو ملتونو نړیواله موسسه ورسره د مشروع، قانونمند او توانمند دولت په جوړولو او غښتلی کولو کې مرسته وکړي. په دې وخت کې زموږ د هیواد له پاره هم موضوع داسې مطرح شوه چې افغانان پخپله خپلې ستونځې نه شی حل کولای، له جګړو لاس نه اخلی او یو مشروع  قوی دولت نه شی جوړولای، نو ځکه لازمه ده چې د ملګرو ملتو تر حمایت لاندې او د نړیوالو په مرستو ورته مدرن او غښتلی ټولنیز، اقتصادي او سیاسي نظام جوړ شي.

د همدې حقوقي، تیوریکي او نظری طرحو تر سیوری لاندې امریکا او ناتو خپل پوځي شتون په افغانستان کې توجِهْ کړ او توجِهْ کوي یې. له ۲۰۰۱ م کال را پدې خوا د امریکا او ناتو د نظامیانو موجودیت او د یوناما په «چوکاټ» کې د دولت په جوړولو او د افرادو په مقررولو او لرې کولو کې د امریکا امر او نهیې د هیواد د اشغال علامه نه بولي، بلکې د ملګرو ملتونو د واکونو په چوکاټ کې د نړیوالو مسئولیتونو، دندو، او پریکړو د تطبیق وسیله ګڼي. کله چې د بن کنفرانس د ملګرو ملتونو د پریکړې پربنسټ او د هغو تر مدیریت لاندې جوړ شو، د افغانستان له پاره یې د یو لړ کارونو د انجام له پاره وعدې او پریکړې وکړې چې په راتلونکې لیکنه کې به ورباندې بحث وکړو.

نور محمد غفوری

20.06.2020