دګوندی غونډی راپور!

 په دنمارک کی دافغانستان د ترقی دملي ګوند حزبی سازمان دروان کال د مارچ د مياشتې په پنځمه نيټه دارهوس په ښار کې غونډه وکړه. دغونډې په کار کې ملګرو جان محمد دوړ ، عبدالله سلیمانخیل ، جنرال عبداستار غفوري، انجنیر محمد نعيم قیومی ، شیرآقا ترین او عبدالغفار نظری برخه درلوده.
داجندا سره سم په ډنمارک کې د ګوندی سازمان د فعالیتونو په اړوند غونډی ته راپور وړاندې سو. دحق العضویتونو دراغونډولو په هکله عملی کړنی وسوی او همداډول دګوندی سازمان دکارونو دلاښه تنظیم په اړوند پريکړه وسوه چه په نژدې راتلونکي کې یوه عمومي غونډه راوبلل سی.
دغونډې په جریان کی دقدرمن محمد آقا شېرزاد سره تیلفوني اړيکه تنظیم اوهغوی دملګرو يو لړ پوښتنو او انديښنو ته دقناعت وړ توضیحات ورکړل .
همدارنګه دغونډې په جریان کې دوستانو دمرحوم پير محمد ناصري دمړيني له کبله یوه دقیقه سکوت اختیار او د مرحومی روح ته یی دعاوکړه . دغونډې کار دګوند په دننه کي داعتماد او باور دفضا دلا پیاوړتیا په هیله پای ته ورسېده.
په درنښت
په دنمارک کی دافغانستان د ترقی دملي ګوند د رهبري شورا مرستیال
شیر آقا ترين.

دافغانستان ملي ترقي گوند دارالنشا اعلامېه

کابل – افغانستان

د ۱۳۹۸ م د سلواغې ۲۹ مه

 ◦ د افغانستان د  ملي ترقۍګوند په خوښۍ خبرتیا تر لاسه کړه چې د افغانستان د ولسمشرۍ ټاکنو کې دولت ساز ټيم ، د افغانستان د ټاکنو د خپلواک کمیسیون له لورې د نهایي پایلو د اعلان له مخې  محمد اشرف غنې د دویم ځل له پاره د افغانستان د اسلامې جمهوریت د ولسمشر په توګه وټاکل شو .

زموږ ګوند چې د ګوندي غړو ، کادرونو او مشرتابه په شریکه پریکړه د دولت ساز ټيم ملاتړ کړی ویاړې چې د هېواد ستونزمنو حالاتو ته په کتو ، د سولي د روان بهیر د اړین مدیریت ، د دفاعې او امنیتې ځواکونو د پياوړي کولو ، په خپلو زیرمو د هېواد د متکې کېدو او په ټوله کې د افغان ولس په ګټه ، د ټاکنیزو ټيمونو له مینځه دولت ساز ټيم په سر کې محمد اشرف غنې د ملاتړ وړ  ګڼلی دی .

که څه هم چې د افغانستان خلکو په خورا پيچلو شرایطو کې د ولسمشرۍ د نوماندانو صندقونو ته د رایې اچونې زړه ښه کړ ، مرګ ژوبله یي په ځانونو منلې ، خو د یو شمیر کړیو او عناصرو د دموکراتیک ضد چلند ، د ټاکنیزو کمیسیونونو د یو لړ غیر مسلکې برخوردونو له وجې د ټاکنو پایلې په خپل وخت اعلان نه شوي ، په خلکو کې د شک او ویرې د پيداکولو هڅې وشوي ، بهرنیو څرګندو کړیو د یو شمیر عناصرو د تشویقولو په ترځ کې د افغانستان د خلکو د ملي يووالي او جغرافیې د کمزورې کولو او ماتولو ګواښونه وکړل ، خو د هېواد د خلکو ، سیاسي مدني وطنپالونکو ټولنو ، ملي وطنې شخصیتونو د زور اچونې په پایله کې د افغانستان د ټاکنو او ټاکنیزو شکایتونو خپلواکو کمیسیونونو د ولسمشرۍ ټاکنو د وروستیو نتایجو د اعلانولو پریکړه پلې کړه .

د ګوند د دارالانشأ له نظره ، اړتیا ده چې د پایلو د اعلان اخستل شوی ګام ملاتړ وشي ، ملت په تیره بیا وطنپالونکې روڼ اندې د افغاني تنکۍ دموکراسۍ د نهادینه کولو ، د هېواد بیا جوړولو ، قانون پلې کولو ، د ښاروندې په ځانګړي ډول د ښځو حقوقو د خوندې ساتلو د فساد د ټولو بڼو پر ضد مبارزې کولو او د سولي د روان بهیر د بریالې کولو له پاره مټې رابډ وهل شي .

همدارنګه نړیواله ټولنه ، د افغانانو د دموکراتیکو ارزښتونو د ساتلو اخلاقې مرستې او د هېواد د بیا جوړونې په کار کې مثمرو  همکاریو کولو ته هڅول کیږي .

د ګوند دارالانشأ هغه سیالو ټيمونو څخه چې په ټاکنیزو سیالیو کې  بریالي نه شول، غوښتنه کوي، چې د افغانستان د اساسي قانون ، د ټاکنیزو کمیسیونونو د لوایحو او پریکړو له مخې د وروستیو  پایلو منل ونه ځنډوي او له هغه حرکتونو او غبرګونونو څرګندولو ډډه وکړي چې هېواد د بحران په لور بیایي .

عبدالحی مالک

 د افغانستان د ملي ترقۍ ګوند ریس

 

ناروی کی تر لږ ځنډ وروسته د افغانسان ملی ترقي ګوندی سازمان جلسه دایره شوه

 

 جلسی د روتینی اجندا تر څنګ په مالی او تشکیلاتی برخو کی د پریکړو تر څنګ  دنوی او همفکره ملګرو د جنبش  په ملاتړ کی د دوکتور شیرباز ځدران تر مشری لاندی دمشرتابه هیت دجوړونکو هڅو پر هر اړخیزه توګه له ملاتړه ډاډ ورکړ او غونډه د ملګرتوب په صمیمانه فضا کی پای ته ورسیده *

 میرویس امیری په ناروی کی د افغانستان ملی ترقي ګوند د سراسری سازمان  منشی  !

گران قدرمن ملگري محمدالله صاپي صاحب د نظر غوره ياداشت

مرام

د سریزې لاسوند

ملي مترقي اهداف

زمونږګران هیواد افغانستان، د ځانګړې جغرافیاي، جیو ستراتیژیکي موقعیت او سترو طبعی زیرمو د شتون سره د پیړیو راهیسې د زبرځواکونو او ګاونډیو د رقابتونو، لاسوهنو او   یرغلونو مضمون پاته شوی.

 په خاص ډول، په را وروسته  څلورو لسیزوکې، کله چه په  هیواد کې بنسټیز او بیړني ټولنیز اصلاحات پیل شول، ورته توطيې چه  د انګلیس لخوا  د غازي  شاه امان الله  مترقي رفورمونو په مقابله کې وشوې،  دا وار د پاکستان او ایران چارواکو لخوا د ارتجاعي او افراطي ـ مذهبي ویجاړونکو، جنګي  ډلو په لاس ترسره شوې. ددې ډلو د  تروریستي او تخریبي اعمالو په څنګ کې  د مخدره توکو کښت او تجارت  را مینځته شو.

د تروریستي  جګړه مارانو  او د مخدره موادو پر خلاف  د مبارزې  په رسمي پلمه  لمړی  روسانو او ورپسې  امریکایانو د خپلو متحدانو سره افغانستان ته لښکرې راوستلې او د مذهبي ډلو سره يې اوږدې جګړې پیل کړې.  زمونږوطنوال د سترو هیوادونو دلښکرو او افراطي ویجاړونکو ډلو سره په جګړو کې سلګونوزره قربانۍ ورکړې، ډیر اقتصادي او فرهنګي ارزښتونه  دمینځه ولاړل، ښارونه، کلي کورونه وران شول، ملیونونه مهاجر شول،  ددې ناورین لړۍ لا تر اوسه روانه ده؛

خلک،  دځینې مجاهد مشرانو او د هغو د نا مسؤلو ملیشو د ظلم، غصب او لوټماریو څخه  ډیر زیانمن شوي دي، د دولتي لوړ پوړي مامورانو د رشوت خورۍ او اختلاس څخه  کلک ناراضه دي، د خارجیانو ړندو بمباریو  ستي کړي دي، د  انتحاریو قربانۍ شوی دي او ددوۍ تر کنترول لاندې سیمو کې افراطي، ظالمانه قواعدو سره د ربړونو ډک ژوند تیروي.

خورا تریخ واقعیت دادی چه په دواړو حالاتو کې، هم د روسانو او هم امریکایانوپه مقابله کې جنګي ډلې، د پاکستان او ایران  څخه استول کیږي، هلته روزل کیږي، مسلح کیږي، پناه ځایونه ورکول کیږي او خورا غښتلی تبلیغاتي استخباراتي ماشین د افغانستان د دولتي نظام د ړنګولو په موخه  کار کوي.

د ۲۰۰۱ کال را پدیخوا د تروريزم  او مخدره توکو پر خلاف  د  امریکایانو او اروپا اتحاديې  نظامي ماموریت سره سره او په افغانستان کې  د دولتي سیستم  د تقويې  په موخه  نړیوال  سياسي، نظامي او مادي مرستو سره  سره،  دغه بحران نه يوازې پای ته ونه رسيد، بلکه لمن يې ورځ تر بلې نور هم پراخه شوه، په نويو بڼو د راز راز افراطي جنګي ډلو او ترهګر پلوه هیوادو،  په تیره  د ګاونډیو  په مټه، زمونږ وطن د جنګ او لاسوهنې میدان وګرځید.  نو ځکه، د افغانستان ملي  ترقي  ګوند   په هیواد کې د وګړو او کورنیو پایدارې سولې او امن ژوند  د پاره مبارزه خپله بیړنۍ دنده بولي.

دد ې دندې د ترسره کولو د پاره تر هرڅه لمړی  په افغانستان کې د دولتي نظام ساتنه او تقویه اړین ده.  داسې نظام چه  په هغه کې  د قانون حاکمیت وي، د ولس د امن او سوله ایزژوند د پاره  غښتلي مسلح قوتونه موجود وي، چه خلک د بیان او انتخاب حق ولري، د تعلیم حق او د ښځو حق د اساسي قانون پر اساس ګرنټي وي.  چه د افغانستان بنسټیز، اقتصادي بنا،  پیاوړې او پراخه  شي.

دافغانستان  ملي ترقي ګوند  پداسې حال کې چه  د ټولو هیوادونو سره  د دولت د ښه  اړیکو پلوی دی، د هرډول اشغال، تړاو او تابعیت پرخلاف، کوم چه زمونږ ملي حاکمیت کمزوری کوی، په کلکه  مبارزه کوي؛ زمونږ دوستي او دښمني د امریکې، پاکستان،  ایران  اوهر بل  هیواد سره،  زمونږ د ملي ګټو د خونديتوب پر اساس غوره کیږي او ارزول کیږي.

دافغانستان  ملي ترقي ګوند غړي، په داسې حال کې چې د خپل  ولس سره  ژورې ټولنیزې  ریښې لري، د خپلو بچیانو سره  ددوۍ په مینځ کې ژوند کوي او د دوۍ د دردونو او کړاوونو پوره احساس کوي، د دوۍ د امن او هوسا ژوند په اړه ژوره انديښنه لری، د یوې ملی سرتاسری ترقي غوښتونکې غښتلې جبهې د جوړښت د پاره په صداقت سره  ګامونو اخیستو ته تیار دي، ترڅو د  سوله ایز، قوي  سیاست پکارولو سره  افغانستان د بیګانه لښکرو او پردیو جاسوسی ځالو، د تورو افراطي مذهبي حلقو، په دولت کې د جنګسالارانو د پراخ حضور او مخدره توکو څخه  خلاص کړي.

دافغانستان ملي ترقي ګوند د اسلام د سپیڅلی دین په پیروۍ، د ملی او اسلامي ارزښتنو په ساتنې، د نورو ادیانو پیروانو ته په احترام،  د خلکو د دیني او مذهبي عقایدو څخه د هرډول ناوړه ګټې اخیستنې سره په مخالفت، د قومي، مذهبي او سیاسي تعصب پرته، اود ګران هیواد عزتمنو، پیاوړو خلکو په مرسته د پورتني اهدافو د سرته رسولو لپاره مبارزه کوی.

 

د افغانستان د ملی پرمختګ ګوند د دارالانشاء اعلاميه

د ۲۰۱۹کال د فبروری ۴ نيته

کابل – افغانستان

د پاکستان اوياکلن مليتاريستی استبداد د خپلو بې شمېره جنايتونو په لړ کې پرون د آزادۍ او انسانی حقوقود لارې يو بل اتل مبارز د پښتون ژغورنې د غورځنګ نامداره او وتلی غړی ابراهیم آرمان لوڼي د خپلو نا ځوانمردانه بريدونو بلهاري کړ .

د اتل آرمان لوڼي شهادت لر او بر افغان ملت د ترور او دهشتګردۍ د پاکستانی مناديانو پرضد را پارولی دی . په خيبر پښتونخوا او د افغانستان په مختلفو ولايتونو کې د اتل شهيد آرمان لوڼي د شهادت او د پاکستان د تروريستی او جنايتکار دولت پرضد اعتراضی غورځنګونه را اوچت شوی دی . د ترور او وحشت پاکستانی سوداګر ناوړه سوچونه کوي چې د دوی تر ستم لاندې ولسونه به د تل د پاره د وژنو ، جنايتونو او بشری ضد کړنو په لړ کې مرئيتوب ته تابع کړي . پاکستانی نظاميګرانو د خپلو دوزخي استخباراتی شبکو او سلګونو تروريستی ډلو په مرسته د پښتون قوم پر ضد په بی ساری بې رحمۍ سره خونړۍ قومی تصفيه ( جنوسايد ) پيل کړی دی .

د افغانستان د ملی پرمختګ ګوند په داسې حال کې چې د پاکستان د وژونکو او وينې چښونکو جنايتکارانو له خوا د اتل شهيد آرمان لوڼي بی رحمانه وژنه په سختو ټکو غندي او يو ځل بيا د پښتون ژغورنې له غورځنګ څخه خپل بی دريغه ملاتړ اعلانوي ، د سيمی او نړي پر حقوقي اوقضايي ارګانونو غږ کوي چې د پښتون قوم له سره د پاکستانی نظاميګرانو ناولي او په وينو لړلی لاسونه ايسته کړي او پاکستانی خونخواره واکمن د بشر د حقوقو څخه د سرغړاوي د نړيوالې محکمې ميز ته راکش کړي .

د پښتون ژغورنې غورځنګ چې د پاکستانی واکمنو د انسانی ضد کردار اصولی او قانونمند غبرګون دی ، د آی-اس-آی د دوزخی سازمان د شيطانی تبليغاتو او ناروا تورونو سره سره ،  د يوه کال په بهير کې د لکونو ځوانانو او پيغلو زړونه او عقلونه تسخير کړل .

 تاريخ د پښتون ولس په  منځ کې د زرګونو څراغ په لاس ځوانانو ، پيغلو ، پوهانو او روڼ آندو د بيداروونکو هڅو او هاند شاهد دی . پښتون ولس د خپل بلال ، د پښتون ژغورنی د غورځنګ د ځوان او زړه وړونکی ( کاريزماتيک ) خو متواضع ، زيرک او زړه ور مشر منظور پښتین غږ ته چمتو او تيار په ليکه ولاړ دی . پاکستانی نظاميګران غواړي د پښتون ولس د آزادی ، استقلال او نېکمرغۍ

لمر د وژنو ، ترور ، ويرې اچونې ، دروغو ، تورونو ، مکر او چل ول په وريځو وپوښي ، خو هغه ورځ ليرې نه ده چې د آرمان لوڼي ، طاهر داوړ ، نقيب مسيد او د آزادی او خپلواکۍ د لارې د نورو اتلانو د سپيڅلو آرمانونو غوټۍ به وغوړيږي . سرلوړی او وياړ به د حماسه جوړوونکو او قربانۍ د لارې د لارويانو او تاريخی بدنامی او رسوايي  به د پاکستاني سړيخورو په ټنډو حک شي .

تل او ځلانده دې وي د اتل آرمان لوڼي د شهادت خاطره!

بريالی دې وي د پښتون ژغورنې غورځنګ !

عبدالحی مالک     د افغانستان د ملي پرمختګ ګوند ریس