حکيم روان

ښاغلی حکمتيار ، پير سيد اسحاق ګيلانی او د طالبانو مشرانو او پنجابي واکمنو په وار وار د جنګ مسؤليت په کابل ور آچولی دی . هم کابل ورانوي ، هم کابل سوځی او هم يې وژني او هم يې ملامتوي . پارادوکس !

عطا چور او حنيف اتمر هم د کابل ضد جريان سره ملګري شول او د جنګ ملامتي پر کابل او اشرف غنی ور آچوي

کابل تل ملامت دی ، حتی هغه وخت هم کابل ملامت وو چې په کابل د جمعيت، دوستم ، حزب وحدت د پټکسالارانو واکمنی وه او طالبانو د کرنيل امام په مشرۍ « ملی قهرمان » «تاکتيکی منډې» ته مجبور کړ او د غلو غدۍ يې تر کولابه تېرې کړې او عطا چور تر ټولو د مخه منډې وهلې .

تاريخ تکراريږي ، مجاهدينو د دوکتور نجيب الله د سولې او مصالحې وړانديزونه بابيزه وبلل او د ټول نظام له منځه وړل يې موخه وه ، په دې کار بريالی شول ، د حکومت سالارۍ پر ځای يې پټک سالاري قايمه کړه او د پنجاب د هيلو سره سم يې ملی اردو او د هيواد وسله وال پوځ توک په توک کړ او وسلې يې څه پاکستان ته د خپلې وفادارۍ د اثبات د پاره ورکړې او څه يې کباړ کړې .

اوس طالبان د نظام  او افغان وسله وال پوځ د له منځه وړلو او پر ځای يې د اسلامی علماؤ د شورا د ايجاد د پنجابی نسخو وړانديز کوي او ټول راز راز مرتجعين ورته خوشاله دي .

اوس عطا چور وايي چې :« نبايد پريږدو چې يو شمېر کسان د خپلو شخصی او سياسی ګټو له پاره د افغانستان د خلکو د برخليک سره لوبی وکړي »

د جهادی چورګرو وجدانونه مړه دی او په سترګو کې يې د حياء په نوم هيڅ نه شته . د عطا چور په اړه د بی بی سی د نامدارې خبرلوڅې ليز دوسيت وروستی راپور ددې چورګر او وحشی قاتل ماهيت پوره افشاء کړی دی . عطا چورګر او  قاتل فکر کوي چې طالبان به ورته د دشت ليلی جنايات وبښي . که مزدور طالبان هغه وبښي ، خو افغان ملت به هغه بشری ضد جنايت هيڅکله دې قاتلينو ته ونه بښي . د افغانستان د خلکو د برخليک سره چې جهادی او طالبی جنايتکارانو څه کړی دی د هيرولو نه دي .

 فرض به يې کړو چې طالبان د پنجابی نسخو مطابق نه ، بلکې زمونږ د ارزو سره سم د افغانستان د سياسی پروسې جز شی آيا سوله به تأمين شی ؟ او پاکستان د افغانستان د پاره يواځې طالبي پروژه درلوده ؟ نه هيڅکه نه !

د پاکستان د امت ورځپاڼې په 2016 کال کې وليکل چې : « د پاکستان داعش له پاکستانی طالبانو ، لشکر جنګهوي ، جماعت الاحرار او احرارالهند له ډلو څخه تشکيل شوی دی . د داعش لوی قوماندان عامر منصور دی . ده د پاکستان په مهمو ښارونو کې داعش ته ځوانان جذب کړی دی او د داعش د پنجاب د څانګې مسؤليت هم د منصور په غاړه دی . داعش په شمال لويديز او د پاکستان په نورو برخو لکه کراچی او لاهور کې 12000 پلويان لري . په کراچی او لاهور کې ښځې او سړي د داعش سره يو ځای شوی دی . دا کسان افغانستان او سوريې ته ليږل کيږی . د داعش د استقرار مرکز د کراچی ښار پيژندل شوی دی .

امت زياتوي چې د کامران ګجر او ښځې نه يې د 120 ښځو لست تر لاسه شوی دی ، کومې چې ټولې د کراچې ښار اوسيدونکی دي او د داعش غړيتوب لري . ګجر اعتراف کړی دی چې ده او ښځې يې د داعش سره د پيوستون له پاره د ځوانانو او پيغلو د ماغزو د مينځلو مسؤليت درلود .

پاکستان د فغان ضد سياستونو د شطرنج څخه د يوه پياده په بايللو ( د طالب په تسليمولو ) د شطرنج له بازي نه وځي او خپلې بازۍ ته به ادامه ورکړي . سوله څه وخت راځي ؟

سوله هغه وخت ممکنه ده چې د دوامدارو نړيوالو بنديزونو په پايله کې پاکستان شل او فلج شی او د بنيادګرو تروريستانو له روزلو ، ګاونډيو هيوادو او نړۍ ته له صادرولو جبرا لاس په سر شي .

حکيم روان

يوه پاکستانی تجار چې نوم او شهرت يې را سره نه شته ، ليکلی وو چې : « پاکستان بايد د اشرف غنی سره ډير احتياط وکړي ، افغانستان هيڅکله دومره هوښيار او دورانديشه رهبر نه درلود . که پاکستان له موجود فرصت څخه د اشرف غنی سره د مناسباتو د عادی کولود پاره ګټه پورته نه کړي داسی وخت به راشی چې پاکستان به په ګونډو له اشرف غنی بښنه غواړي او هغه به وخت نه لری چې د بښنې په اړه د پاکستان زارۍ واوري.»

اشرف غنی نهايي هڅه وکړه ، څو پاکستان له افغانی ضد سياستونو راوګرځوي . خو کله چې پوه شو پنجابی واکمن د افغانستان پر ضد له شرارته لاس نه آخلی ، نو د تروريست پاکستان نړيوالې انزوا ته يې بډي ووهلې . همدارنګه يې هڅه وکړه څو د افغانستان تجارت او اقتصاد د پنجابی واکمنو له پرلپسې ګواښونو خلاص کړي . د افغانستان د اقتصادی او تجارتی اړيکو له پاره يې د کراچی بندر متبادل ، د چابهار بندر خلاص کړ ، چې د لومړی ځل د پاره هندی کشتيو افغانی توکی هند ته وليږدول او په هره يوه يا دوو اونيو کی به دا کشتی د هندی او افغانی مالونو د وړو راوړو کار ته ادامه ورکړي . پاکستان زمونږ صادرات نه يواځې د ځمکې له لارې نه پريږدی ، بلکې د هوا له لارې يې هم ګواښونه کړی دی. اشرف غنی د افغانی توکو د پاره د هوايي دهليزونو بر سېره د لاجوردو تاريخی لاره هم خلاصه کړه ، چې له دې لارې زمونږ توکی آذربايجان ، ګرجستان ، ترکيې او د ترکيې له لارې اروپا ته لاره مومي .

افغانستان نور په اقتصادی ډګر کې د پاکستانی جنايت پيشه واکمنو له ګواښونو خلاص او آزاد شو .

همدارنګه افغان ولسمشر وکولای شوه چې په مستنده توګه پاکستان په نړيواله ټولنه کې د تروريسم د ملاتړی په توګه معرفي کړی . د همدې هڅو او هاند په پايله کې د امريکا ولسمشر ښاغلی ترمپ اعتراف وکړ چې پاکستان امريکايي رهبران د احمقانو په څېر تېر ايستلی دی او زمونږ د ملياردنو ډالرو په بدل کې يې مونږ ته دوه مختوب او دروغ وړاندې کړي دي . له دې امله د امريکا متحده ايالاتو پر پاکستان خپلې مرستې تر هغه بندې کړې ، څو پاکستان په عمل کې د طالبانو او حقانی د تروريستی شبکې پر ضد د افغان حکومت او امريکا ملاتړ نه وي کړی .

افغان ولسمشر اشرف غنی وو چې پاکستان يې د تروريسم د ملاتړ له امله په نړيواله کچه منزوي کړ. ځکه پاکستان خپلو طالبي تالی څټو ته دنده سپارلي ده چې د اشرف غنی او دده د حکومت سره به سوله نه کوي . د آی-اس-آی او د هغو د نوکرانو ( طالبانو ) له پاره د سياست له ډګره د پاکستان د نه پخلا کيدونکی دښمن افغان ولسمشر اشرف غنی ايستل د لومړۍ درجې لومړيتوبونو څخه دي .

د دوحې په وروستيو خبرو کې د پاکستان غوښتنې طالبانو د ميز سر ته راوړي دی او امريکايان يې هڅولی دی چې د پاکستان غوښتنې د مذاکراتو د چوکاټ برخه وبولي . طالبان په مذاکراتو کې داسې رول بازی کوی چې د پاکستان رسمی مامورينو په دومره سپين سترګی سره نه شو بازی کولای .

طالبان له جنرال مشرفه ښه پاکستانيان دی ، يواځې د پاکستان د بيرغ لاندې نه ، بلکې د مولانا سميع الحق او کرنيل امام تر بيرغ لاندې د افغانستان پر ضد او له پاکستانه د دفاع دنده تر سره کوي .

جهاد طالبان –  دفاع پاکستان !

حکيم روان »«

(جنرال ضياءالحق )

د پاکستان مشهور ژورناليست علی احمد مهر د الجزيرې له عربی تلويزيون سره په مرکه کې وويل چې د هغو ملياردونو ډالرو له جملې څخه يو مليارد دالر نن پاکستان ته راورسيدل ، کوم چې د طالبانو په سر د عربی اماراتو او سعودي له خوا پاکستان ته منل شوی وو . اوس به طالب دې انجام ته څه وايي ؟ د افغانستان د آزادۍ د پاره جګړه د پاکستان له پاره په ملياردونو ډالرو واوښته ؟ طالب د چا د پاره جنګيږي ؟

له بله پلوه افغان ولسمشر دوکتور اشرف غنی د سويس په داووس ښار کې وويل چې يواځې د ده د ولسمشرۍ په دوره کې طالبانو ۴۵ زره افغان پوځيان وژلی دی او تر دې زيات معلول شوي دی . په دې موده کې د خارجی وسله والو تلفات ۷۴ کسان دی . او دا يې هم زياته کړه چې طالبان د جنايتکارو مافيايي ډلو سره اړيکی لري .

اوس مالومه شوه او کنه چې : « جهاد طالبان ، دفاع پاکستان ! »  ده ؟ نوم يې دی د افغانستان د آزادۍ له پاره مبارزه !!!  راشه که يې ګورې !

پاکستان په ډاګه پر تروريسم تجارت کوي . دادی طالبی تروريستانو ورته بيا ملياردونه وګټل .

سعودی او عربی اماراتو هر يوه د امريکا د راضی ساتلو له پاره پاکستان ته درې درې مليارده ډالر ومنل، څو طالبان د خبرو ميز ته کينوي . له دې شپږ ملياردو ډالرو څخه نن د ۲۰۱۹کال د جنوری په ۲۶ نيټه يو مليارد ډالر پاکستان ته ورسيدل . ددې ملياردونو ډالرو بيه د افغان وسله وال پوځ د ۴۵ زرو افغانو مسلمانو ځوانانو وينې او سرونه دی او د پنځو څلويښتو زرو کورنيو په کور ، کلی او کوڅه کې وير او ماتم دی . دا د هغو ملکی تلفاتو د پاسه دي کوم چې د پاکستانی مدرسو د ځان مرګو په بريدونو کې په وينو کې لمبول شوي دي . د خدای او شريعت د پاره د طالبانو جګړې پاکستان ته ملياردونه راوړل او په افغانستان کې يې د وينو حمام جوړ کړ ؟ دا څنګه چل دی ، طالب ځان افغان بولی ، خو ګټه يې د پاکستان او زيان يې د افغانستان دی ؟ جنرال ضياءالحق رښتيا ويلی وو چې : « جهاد افغانستان ، دفاع پاکستان ! »

طالبان لا هم چانې وهی تر څو علاوه پر نورو پنځو مليارد دالرو، خپل مولا او ملاتړي  ( پاکستان ) ته نور هم ګټه وکړي . لا هم خونړی بريدونه کوي ، څو ترهه واچوي ، ويره خوره کړي او نړۍ قانع کړي چې د ترهګرۍ زور ته سر ټيټ کړي . طالب د پاکستانی جلادانو سره کيني ، خو د افغان حکومت سره نه کيني . طالب چې د پنجاب ځنځيری سپی نه دی نو څوک دی ؟ طالب هر وخت د روس سره د ايران او چين سره کيناستو ته تيار دی ، خو افغان حکومت نه مني ! دا ځکه چې پاکستان هم غير له پاکستانی لاسپوڅي حکومت ( لکه د طالبانو حکومت ) بل افغان حکومت نه مني .

طالبان وايي چې افغان حکومت لاسپوڅی دی ، خو افغان حکومت تر ننه هيچا ته ملياردونه نه دی ګټلی . همدارنګه افغان حکومت د طالبانو په شان پاکستان د مذاکراتو ميز ته نه دی راکش کړی . که طالب لاسپوڅی نه وي ، بيا څنګه پاکستان علنی وايي چې هغه دی د امريکا په خاطر مو طالبان د خبرو ميز ته راکش کړل ، اوس نو امريکا بايد د پاکستان سره اړيکی د پخوا په شان عادي کړي . اوږد غوږي طالبان لا خبر هم نه دی چې د پاکستان – امريکا د اړيکو جوړولو د پاره د وسيلې په توګه استعمال شول . تر ډيره حده دا خبره طبيعی هم ده ، ځکه پاکستان د طالبانو خاوند دی او طالبان د پاکستان مخلوق او ملکيت .

که طالب لاسپوڅی نه وی ، بيا څنګه د طالب د مذاکراتو په سر پاکستان ملياردونه آخلی ؟ که طالب لاسپوڅی نه وی ، ولی دا ۱۷ کاله د سولی مذاکراتو ته نه حاضريده او تر ننه يې يواځې د افغانانو وينی تويولې . « دا ځکه چې د طالبانو پيغامبر کرنيل امام ويلی وو چې بايد د افغانانو چټلی وينی تويې شي » .

که طالب لاسپوڅی نه وي نو ولی نړۍ ته نه اعلانوی چې دوی په خپل سر او خپله اراده مذاکرات پيل کړي دي ، بايد څوک د طالبانو په سر چا ته ملياردونه ور نه کړي ؟ او که څوک د طالبانو پر سر ملياردونه ورکوي ، بايد افغانانو ته يې ورکړي .

که طالب لاسپوڅی نه وي ، څنګه د نړی سلګونه هيوادونه افغان دولت په رسميت پيژنی ، خو طالب تالی څټی يې نه پيژنی ؟

افغان دولت د بين المللی مناسباتو په چوکاټ کې د خپلو وسله والو ځواکونو د پاره تر وسه هر څه تياروي ، بيا هم زمونږ وسله وال پوځ اکمالاتی اړتياوې لري او د جنګ بار د افغان دولت ملا کږه کړی ده ، طالب که د چا مزدور نه وي، د يوې تروريستی ډلې په توګه اکمالات له کومه کوي ؟ او د کومو مناسباتو په چوکات کې خپلې جنګی ليکې اکمالوي ؟

وايي قرون وسطايي طالبانو تغير کړی دی . روسان وايي چې : « کوپ ګور اصلاح کوي » . پښتانه وايي چې : « مکې ته په تګ خر نه حاجی کيږي » . طالبان تر اوسه صحرايي محاکمی کوي ، په درو خلک وهي ، ښځې سنګساروی ، لاسونه پرې کوی او تر نفوذ لاندې سيمو کې مکتبونه نه پريږدي . دا د طالبانو کار نه بلکې د آی-اس-آی ستراتيژی ده چې افغانی ټولنه بايد د انسانی ژوند له محوره وباسی .

طالبان افغانان وژني ، خو د سولې خبرې د امريکا سره کوي . دا څنګه چپه دنيا ده ؟ طالبانو د ملکی افغانانو د وژنو برسېره يواځې د افغان وسله وال پوځ ۴۵ زره کسان د کم او زياتو څلورو کالو په موده کې وژلي دي ، خو سورې نارې د امريکا سره د جنګ کوي ، په همدې موده کې د امريکائيانو په شمول ټول ټال۷۴ کسه خارجيان وژل کيږي . مونږ د افغانستان د مدافعينو په مرګ په ځانګړی توګه او د خارجيانو او طالبانو په مرګ ژوبله هم خواشيني کيږو ، خو پوښتنه داده چې آیا طالبان ځانونه د خدای (ج) او د هغه د مسلمان مخلوق په وړاندې د ځواب په ويلو ملزم بولي او کنه ؟ داسې ښکاري چې نه .

پاکستان په ډاګه اسلامی سخت دريځي او تروريستان روزي ، او د تروريسم په سر ملياردونه ډالر سودا کوي ، خو نړۍ رډ رډ ورته ګوري . نه تر اوسه پاکستان چا د شرارت مرکز وباله او نه چا د تروريسم د ملاتړ او حمايت په تور ليست کې شامل کړ. پاکستان په ډاګه د تروريسم د روزونکی او ملاتړي په توګه سرې سترګې ګرځي ، په ګاونډي افغانستان او هند کې درګرد خونړي تروريستی بريدونه کوي او د بريدونو تنظيموونکی د آی-اس-آی په دهليزونو کې د آی-اس-آی د اتلانو په توګه کښته او پورته کيږي ، تر ننه چا له پاکستانه د لسګونو او سلګونو زرو بی ګناه افغانانو د وينو او سرونو پوښتنه ونه کړه . دا ولې ؟ دا ځکه چې پاکستان او ايران په افغانستان کې طالبان ، حزب اسلامی حکمتيار، حزب وحدت اسلامی ، جمعيت اسلامی او د ګوډاګيانو سلګونه غدۍ لري . وايي : « ونې ژړل چې د تبر لاستی زما له تنې دی » .