په اروپا کې د افغانستا د ملي ترقۍ ګوند شورا

د ۲۰۲۰ م کال د فبرورۍ ۳ مه

د ګوند د اروپا شورا مشر ( محمد اسماعیل غرني ) په نوښت د ګوند د بهرنیو یو شمیر شوراګانو استازو د ګوند د مشر  محترم عبدالحي مالک په ګډون سکایپي غونډه جوړه کړه . په سکایپي خبرو – اترو کې په لاندې موضوعاتو تود بحث وشو :

• د ګوند د راجستریشن او ګوندي ژوند یو شمیر مهمو مسألو په هکله .

• د افغانستان د ولسمشرۍ ټاکنو د وروستیو پایلو او د سولې روان بهیر د څرنګوالي په باب .

• د پښتون ژغورني یا پي ټي ایم مشر منظور پښتین د نیولو په وړاندې د نړیوال پراخ غبرګون د نتیجو په برخه کې .

غونډي ته محترم امیر محمد ګران چې پخوانی دیپلو مات او د سیمې د چارو وتلی څيړونکی دی ، د پاکستان د جوړېدو ، په نوموړي هېواد د پوځيانو د واک ټينګېدو ، له قومي لږکیو په تیره بیا پښتنو سره د مور او میري سلوک لرلو ، د پښتنو ،بلوڅو او سندیانو د حقوقو د وتلو مدافعانو د زورولو تري – تم کولو او وژلو ، له اسلام څخه د خپلو موخو په پار ناوړه ګټې کولو ، اسلامي بنسټپالنې او ترهګرۍ ته د ودې ورکولو او صادرولو ، د ترهګرۍ د تمویل په هدف د مخدره توکو تولیدولو او لیږدولو – د وسلو او انساني قاچاق د هڅونو ، په سیمه کې د خدایي خدمتګارو نه نیولي تر پښتون ژغورنې غورځنګ د جنبشونو د راټوکېدنې او ودې د اړتیا ، د عبدالصمد خان او نورو مشرانو شهیدانولو ، د غفارخان – ولې خان – محسن داوړ  – علي وزیر – منظور پښتین او نورو مشرانو زولانه او بندیانولو په څير مهمو مسألو په هکله ، غونډې ته ارزښتناک او  د پاملرنې وړ مالومات وړاندي کړل .

وروسته په نوبت د غونډې ټولو برخه والو په بحث کې فعال ګډون وکړ او هر یوه د ګوندي ژوندانه د لا ښه کولو ، د ولسمشرۍ د ټاکنو د نتجو د بې له ځنډه اعلانیدلو ، د سولې بهیر د کاواکه خواؤ د څېړلو او سمې سمت نیونې ته د هغې د راګرځولو ، د پښتون ژغورنې غورځنګ د ټوکېدلو اړتیا اهمیت او د غورځنګ د مشر منظور پښتین د غیر قانوني نیولو او زورولو په اړوند لاندې څرګندونې وکړي :

د ګوندي راجستریشن بهیر مخته تللی ، ګوندي مشرتابه د بهیر زیاتې مسألې حل کړي ، وړاندیز کیږي چې د ګوند د راجستر پيل شوي پروسه دې لا نوره هم چټکه او بشپړه شي .

په اروپا کې د ناروي او جرمنې ګوندي شوراګانې د فعالېدو په حال کې دي . وړاندیز کیږي چې په نورو هغو هېوادونو کې چې ګوندي شوراګانې کمزوري يا فعالي نه دي د ګوند د مشرتابه او د اروپا د ګوندي کادرونو په مرسته فعالې شي ، سازمانونه او ګوندي کمیټې يي ورغول شي او ګوندي ونډه او بسپنه یي راټوله شي .

د ولسمشرۍ ټاکنو د نتیجو د اعلان بهیر ډير وخت ونیو . داسې بریښي، چې څرګندې  کړۍ هغه د بحران خواته ټيله کوي ، ټاکنې د سولې د روان بهیر سره داسې تړل چې د ډموکراسۍ مرۍ خفه ، غیر ډموکراټيکو ډلو او عناصرو ته د ننګینې سا ایستو مجال ورکړي ، د افغانستان د خلکو په انساني حقوقو ستر ګزار دی . وړاندیز کیږي چې ګوند د اعلامیو خپرولو ، ګردي ميزونو جوړولو ، د نورو ډموکراسۍ پلوه ګوندونو ،نهادونو ، شخصیتونو سره د اړیکو ټينګولو او د هغوئ د هڅولو له لارې د ټاکنو پایلو د تالا – ترغه کېدو د مخنیوي لارې چارې ولټوي .

د سولي روان بهیر د افغانستان د یو شمیر ګاونډيانو ، نړیوال ځبر ځواکونو او د هېواد د یو شمیر جګړه غوښتونکو تنظيمي ، زورواکو او مفسدو کړیو د ناروا ګټو د بیلانس په یوه افغاني ضد سیالۍ اوښتی . مالومیږي چې لوبغاړي د افغانستان او ولس د ګټو پر ځاي خپلو ګټو ته ژمن دي . دا ډول چلند سوله نه شي راوستلی خو جګړه اوږدولی شي . وړاندیز کیږي چې ګوند په بهر او د هېواد دننه د ټولو لارو – چارو په کارولو سره د افغانستان خلک او نړیوال وهڅوي څو د داسې سولې له پاره کار وشي چې د افغانستان خلک او حکومت د سولې بهیر مهمه برخه وي . هسې سوله راشي چې د جګړې ټغر ټول او د یاغي هر خیل ډلو د مخنيوي زمینه برابره کړي . ګوند باید د خپلو خپرونو او نورو وسیلو پر مټ هغه کړۍ افشا کړي څوک چې خپلو او د اجنبې ګټو له پاره د سولې بهیر ، له پيچلتیاؤ سره مخامخ کوي .

د پښتون ژغورنې غورځنګ په سیمه کې د بې تاوه ټولنیز سیاسي جنبش او انقلاب په توګه اهمیت او اعتبار پيدا کړی . منظور پښتین د نوموړي غورځنګ د کرازماتیک مشر په څير سیمه ایز او نړیوال شهرت موندلی دی . د هغه په نوښت او مشرتابه د پښتونخوا ، پښتنو او نورو قومونو د تاریخ ډيرې سترې غونډې جوړې کړي ، د پښتنو د ډله ایزې وژنې او زورونې زیاتې سترې پوښتنې په همدې غونډو کې مطرح شوي . د لمړي ځل له پاره د پاکستان د پوځ او استخباراتو څېره د دغو غونډو له لارې برسیره شوي . د پوځ او استخباراتو مجازي غرور د همدغه غونډو په برکت په ځمکه راپریوت . پې ټې ام یا پښتون ژغورنه اوس په ټوله نړۍ او د پاکستان دننه کې د عدالت او حق غوښتنې یو معاصر غورځنګ پيژندل کیږي . که تېروتنه ونه شي دا غورځنګ به په نوي بڼه د شلمې پيړۍ د انقلابي غورځنګ داسې بدیل وړاندې کړي چې وینه تویونه به په کې ځاي ونه لري .

منظور پښتین پښتنو ته د پيښو مسألو یو نوملړ وړاندې کړی چې په عمده ډول د پښتنو او ستم لاندې قومونو د حقونو د تروړلو د مخنيوي او عدالت د تأمین پيغام له ځانه سره لیږدوي . پښتین هغه کړۍ په ګوته کړي چې حقوق تر پښو لاندې کوي او د قومونو طبیعي زیرمې د ځان په ګټه لوټوي . هغه د پاکستان دننه او له هغې څخه بهر تر ستم لاندې ولسونه اګاهانه بې تاوه مبارزې ته رابولې . له دې کبله تر دې دمه زموږ ګوند د پښتین د روان جدو جهد ملاتړ کړی او په دې بهانه چې هغه د خپلو خلکو له پاره حقوق او عدالت غواړي ، زندان ته اچول کیږي او وزورول کیږي ، د ملي ترقۍ ګوند له پاره هیڅکله د منلو نه ده .

وړاندیز کیږي چې له یوه پلوه د هېواد دننه او بهر ګوندي شورا ګانې د ګوند له خوا و هڅول شي چې په سیمه او نړۍ کې بشرپالې ټولنې ، شخصیتونه ، پارلمانونه ، حکومتونه ، د ملګرو ملتونو سازمان د پاکستان له مظالمو خبر کړي او له هغوئ هیله وکړي، چې د بې تاوه مبارزې سرلاری منظور پښتین بې له ځنډه خوشي کړي . له بلې خوا د افغانستان په عدالت او حق غوښتونکو ټولنو ، نهادونو او اړوندو دولتي ادارو غږ وکړي چې په یوه پياوړي همغږۍ د پيښې شوي ستونزې د عاجل حل له پاره ګډ کوښښونه وکړي .

په پاي کې د افغانستان د ترقۍ ملي ګوند رئيس عبدالحې مالک د اروپا د ګوندي شوراګانو او ګوندي مشرتابه ګډه سکایپي غونډه یو غوره نوښت وباله او د یو لړ نظریاتو په وړاندي کولو سره یي د غونډې برخه وال ډاډه کړل چې مطرح شوي وړاندیزونه به د ګوند د دارالانشأ سره شریک کړي او د ګوندي توان او واک په دائره کې به د وړاندې شوي پيشنهادونو د عملي حل د را اېستلو هڅو ته دوام ورکوي .

په درناوي

محمد اسماعیل غرنی

د ا م ت ګ د اروپا شورا رئيس

په جرمني کي د پښتون ژغورني غورځنګ د مشر ، منظور پښتين او نورو فعالينو د خوشي کولو لاريون :

ليکنه ــ اميرګران

په پيښور کي د PTM د مشرمنظورپښتين او د خوځښت د نورو فعالينو له غيرقانوني نيولو او بيا په زندان کي له بندي کولو وروسته په پاکستان ، افغانستان او د نړۍ په 23 هيوادو کي 730 لاريونونه شوي او د لاريونونو لړۍ به ترهغه وخته روانه وي ترڅو منظورپښتين او د غورځنګ ټول فعالين خوشي او هم د دوي قانوني ، حقوقي او انساني غوښتني ومنل شي ، د ديره اسماعيل خان له زندان څخه په ضمانت د منظورپښتين د خوشي کولو غوښتنه رد شوه ،

د پښتنو د مدني ــ سياسي خوځښت د رهبرانو او ډيرو نورو سياسي او ولسي فعالينو نيول د پاکستاني پوځي حاکم اشرافيت او استخباراتو ( ISI , IB , MI ) لخوا د ظلم ، زورزياتي او غيرانساني کړنو يو ښکاره مثال دي ، په پاکستان کي د پوځي ديکتاتورانو او د دوي د پراکسي کړيو لخوا په پښتنو ، بلوڅو او نورو قومونو باندي ظلمونه او د دوي د طبيعي حقونو غصبول به حالت نور هم خراب او کړکيچن کړي ، په پښتنو دا ډول فشارونه او زورزياتي به زيات شي ، وبه ځپل شي ولي تسليم به نه شي او هم د خپلو قانوني غوښتنو د لاس ته راوړلو او ژغورني لپاره به لا پياوړي ګامونه واخلي ، د پاکستان په لنډ 73 کلن تاريخ کي ياني د دغه هيواد له مصنوعي جوړښت 1947 م راپديخوا ، پاکستاني حاکم استبلشمنټ له پښتنو او نورو ليږکيو او مظلومو قومونو سره غيرانساني او ناوړه چلند کړي ، د دوي په طبيعي زيرمو ئي خيټه اچولي او له خپلو انساني حقونو ئي بي برخي ساتلي ، د پښتنو ستر او مبارز شخصيتونه او رهبران ئي زندانونو ته اچولي ، پښتانه لوټــل شوي ، وژل شوي او جـــبــرآ وطن پريښودو ته اړ شوي ، پر پښـــتــنو دا ناتار له 11/9 حادثي وروسته چي په 2001 م کي واقع شوه لا زيات او نوي بُعدونه ئي پيدا کړل ، په 80 ميلادي لسيزه کي په افغانستان کي د ” جـــهـــاد ” په نوم پروژه چي د تنظيمونو ، طالبانو او اوس مهال د داعش په نومونو رواني دي ، موخي ئي د ډيورند د تحميلي کرښي شاوخوا د پاکستان د سوق الجيشي استحکاماتو او ستراتيژيک عمق د پراختيا لپاره ده ، دا د ديکتاتور ضياء الحق او چارلي ويلسن د جهاد پروژي دي ،

چارلي ويلسن يوځل په 1980 م کال 30 مليونه امريکائي ډالر او بيا په 1986 م کي 630 مليونه امريکائي ډالر د مجاهدينو پروژي ته بودجه برابره کړه ، د عوامي نيشنل پارټي پياوړي او دروند مشر ارواشاد خان عبدالولي خان ماته په يوه ملاقات کي د ستر مشر پاچاخان خبره تکرار کړه چي ويلي ئي ول ” په افغانستان کي جګړه جهاد نه بلکه فساد ده ” د دغو پروژو د عملي کولو لپاره له امريکا سره د پاکستاني مزدور حاکم اشرافيت مرستي او د جيوپوليټکي اوږد مهاله اهدافو لپاره زمينه برابره ول د دي باعث شول چي د پاکستان فاشيستي پوځ په قبايلي سيمو کي خپل د يو لک په شاوخوا کي په سلګونو زره پښتانه ووژني ، کورونه او کلي ئي وران ويجاړ کړي ، بازارونه ئي وسوځوي ، د سيمي د خلکو د رپوټونو په اساس 80 زره ځوانان او بي ګناه خلک مړه شوي ، د 30 زرو په شاوخوا کي ورک دي ، د پوځ ، مليشو او د دوي د ګووډ طالبانو لخوا اوس هم Target Killings يا هدفي وژني په بي رحمۍ دوام لري ، جبري نيوني ، د خلکو بي درکه کيدل او د ماوراي عدالت Extra Judiciary قتلونه پاي ته نه دي رسيدلي ، که ووايو چي نژادي ، اقتصادي او کلتوري جينوسايد روان ده بي ځايه به نه وي ، د پاکستان پوځي جزوتامونه د امريکا په گرين سيگنال د ضرب عضب او اوس د ردالفساد عمليات شروع کړل او وتوانيدل چي قبايلي پټاره لاندي او خپل مورچلونه د خپلو جيوستراتيژيکو اهدافو لپاره مستحکم کړي او له دغو مورچلونو په افغانستان ، کشمير او سيمه کي خپلو تروريستي فعاليتونو ته دوام ورکړي ، او په لکونو د وزيريستان نارينه ، ښځينه ، ماشومان او سپين ږيري IDP يا غيرسکنه کړي ، له دوي سره ئي هرډول ظلم او وحشت وکړ او ادامه لري ،

د ظلم او وحشت پايله دا شوه چي ځپل شوي او سوځيدلي پښتانه په زخمي او دربدرۍ حالت کي د خپلو طبيعي او

قانوني حقوقو د اعادي ، سولي او باعزته ژوند کولو Live with dignity لپاره چــــــــــيــغــه پورته کړي ،

د دغه ستر او شريفانه نوښـــــــت مـــخــکښــــان بي له شکه منظورپښتين ، علي وزير ، محسن داوړ او نور دي ، منظور پښتين د حق او عدالت غوښتني چيغه لومړي د ” مسيد تحفظ موومنټ ” په نامه په 2014م کال له وزيريستانه را شروع کړه ، چي په پراخه کچه ئي ملاتړ وشو بيا ئي نوموړي خوځښت د پښتون تحفظ موومنټ PTM چي د پښتنو د تاريخي ـ ولسي حرکت ظهور او يو مدني ـ سياسي خوځښت دي په نوم ياد کړ ، بايد زياته شي چي د PTM غورځنګ په 2018 م کي د فبروري په مياشت کي د لومړي ځل لپاره په اسلام اباد کي د لسو ورځو لاريون وکړ له دغه لاريون څخه د پاکستان اکثريت سياسي او مذهبي ګوندونو ملاتړ وکړ او رهبرانو ئي د منظور پښتين په مشرۍ د پښتون ژغورني د غورځنګ د حقوقي او قانوني مطالباتو کلک حمايت اعلان کړ او وروسته له لسو ورځو د مسلم ليګ ـ نواز ګوند حکومت د شاهد خاقان عباسي په مشرۍ د دوي د غوښتنو د پوره کولو وعده ورکړه چي تر اوسه نه دي عملي شوي ، د توجه وړ ده چي د منظورپښتين په مشرۍ د پ ټ ام په مدني ـ سياسي خوځښت باندي

په بي ساري ډول لـــــــراو بـــــــر او په ټوله نړۍ کي افغانان / پښتانه را ټول او د دوي د حقوقو د احيا لپاره لاريونونه او مبارزه کوي ، له پښتنو سره د ظلم او زورزياتي دوام او د دوي د غوښتنو غږ نه اوريدل اوس پاکستاني فاشيستي پوځ او استبلشمنټ له واقعي ګواښ او چلنج سره مخامخ کړي دا ګواښ ساده او لنډمهاله نه دي دا د پاکستان بقا ګواښي او د دغه ميليوني خوځښت مخنيوي ستونزمن بريشي ، د پښتونخوا د سياسي شنونکو او تينک ټانک له نظره

له پښتنو سره د پوځ ښکيلتيا به پاکستان او پوځ منزوي کړي خو پښتنو زرګونه کلونه پر دي خاوره ژوند کړي ، انګريزي امپريل ښکيلاک او نورو زبرځواکونو سره ډغري وهلي چي ژوندي پاتي شي او همداسي به ژوندي او سرلوړي پاتي کيږي خو پاکستاني پوځي استبلشمنټ ، استخبارات او په مجموع کي پاکستان به د زوال په لور روان وي ، پاکستان نه وو او نه به وي خو افغانان / پښتانه وو او په همدي خاوره به پاتي وي ،

د PTM ځوان او سرورکونکي رهبر منظورپښتين ئي ولــــــــــــي ونيو :

۱ــ د پښتون ژغورني د غورځنګ لخوا په 12 د جنوري د مياشتي يوه پراخه او تاريخي جلسه جوړه شوي وه او منظورپښتين د پخوانيو غوښتنو ترڅنګ د پښتنو د يووالي او اتحاد ، د پښتنو په سيمو او افغانستان کي د جګړي د پاي ته رسيدو او د ژوند سخت او ستونزمن وضعيت په تړاو د پښتنو د لوئي جرګي د رابللو وړانديز کړي وو چي د پاکستان دولتي اداري له هغي جملي پوځ دا نه غواړي ،

۲ــ د وزيريستان د اتمانزيو د قبيلو پرلتونه چي د ړنګ شويو کورونو ، بازارونو او جايدادونو … د معاوضي لپاره ترتيب شوي او پوځ ئي نه مني ،

۳ــ پخوانۍ 5 غوښتني او د Truth and National Reconciliation Commission  د تشکيل چي تر اوسه نه دي عمل شوي ،

د پورتنيو غوښتنو خصوصآ د لوئي جرګي د رابللو د منظورپښتين د نيولو دلايل ياد شوي ،

دا هغه خبري وي چي ما د منظورپشتين په ملاتړ مظاهري کي چي په فرانکفورت کي د پاکستان د قونسلګرۍ په مخ کي ترتيب شوي وه کولي خو د زياتو ويناوالو د شتون له امله زما بيانيه هم لنډه وه ،

په پاي کي د پاکستان له پوځي ـ ملکي واکمنو څخه کلکه غوښتنه کوو چي منظورپښتين او د غورځنګ ټول فعالان ډير ژر خوشي او د دوي قانوني ـ حقوقي مطالبات ومنل شي .

خبريال : اندرې سېرېنکه

ژباړونکی: شېرحسن حسن

په روسيه کې مېشتو پښتنو- افغانانو، اسلام آباد د تروريزم  په ملاتړ تورن کړ.

د فبروري دوهمه په روسيه او ټوله نړۍ کې د پښتنو – افغانانو د قهر ورځ وه.

پرون د فبروري دوهمه په روسیه کې مېشتو پښتنو- افغانانو په مسکو، سانکت پترزبورک، کراسنادار، رستوف-نا-دانو او د روسيې په نورو ښارونو کې د پراخو غونډو په ترڅ کې د پښتون ژغورنې غورځنګ (پښتون تحفظ مومنټ) «PTM » ملاتړ وکړ ، چې مشران او فعالین یې دپاکستان د پوځې ادارې  تر ظلم او فشار لاندې يا وژل کېږي او یا نیول کیږي.

  د غونډو برخه والو غوښتنه وکړه چې د پاکستان نظامی اداره دې د پښتنو د مشرانو تهديد او تعقيب ودروي او په افغانستان کې دې د ترهګرو ډلو له ملاتړ څخه لاس واخلي.  په روسيه کې مېشتو پښتنو په نړیواله ټولنه غږ وکړ چې په پاکستان کې د بشري حقونو پراخو او پرله پسې اوږدمهاله سرغړونو ته پاملرنه وکړي.

په مسکو کې د مېشتو پښتنو-افغانانو ټولنې زموږ خبريال ته وويل چې په غونډو کې د افغانانو او د ډيورند د کوزې خوا (د پاکستان تر تسلط لاندې) پښتونخوا پښتنو برخه اخيستې وه. هغوی وايي: «موږ د مشترکې وينې،مشترکې ژبې ،مشترک دين ،مشترک کلتور، مشترک تاريخ  او  په روانو حالاتو کې د مشترک درد او امنيتي ستونزو  په تنابونو کلک تړلی واحد ولس يو،  او د پاکستان واکمنه پوځې اداره  او استخبارات زموږ د ولس په وړاندې د جينوسايډ  (نسلوژني) سياست پرمخ بيايي».

د  پراخو غونډو په ترڅ کې د پي ټي ام د ملاتړ لپاره د فبروري د دوهمې نېټې غوره کول هم څه تصادفي خبره نه ده . يو کال مخکې په همدې ورځ د پي ټي ام د مشرتابه فعال غړی، وتلی پښتون شاعر او ليکوال د پښتو ادبياتو پروفیسر ابراهيم ارمان لوڼي  په بيرحمانه ډول ووژل شو. هغه د بلوچستان په لورلايي ښار کې د پاکستان پوليسو په مرګوني او بېرحمانه وهلو ځای پر ځای وواژه. د پروفیسر لوڼي د بېرحانه وژلو تراژيدۍ او غم د «ډيورند خط» په دواړو خواو اوسېدونکو پښتنو- افغانانو کې د ويښتیا لويه انګازه واچوله».

د روسيې په ښارونو کې د پې ټي ام په ملاتړ پرونۍ غونډې د مسلمانانو د مبارک  کتاب – قرآن شریف د اياتونو په لوستلو ، د ابراهيم ارمان لوڼي روح ته په دعا او درنښت د يوې شېبې په چوپتيا پيل شوې. د فبروري په دوهمه د شاعر او ليکوال پروفيسور لوڼي د شهادت د کليزې په درناوي د اروپايي ټولنې په لويو ښارونو ، سکانديناوي هيوادونو، امريکا متحده ايالاتو، کاناډا، استراليا ، هند، د افغانستان په ګڼ شمير ښارونو او د پاکستان په ښارونو کې  هم غټې غونډې، مظاهرې او لاريونونه وشول او په زرګونو افغانانو او پښتنو ګډون په کې کړی و.

د مسکو د غونډې برخه والو زموږ خبريال ته وويل «موږ د پښتون ژغورنې غورځنګ ملاتړ څرګند کړ ، چې مشران یې نن د پاکستان د پوځي ادارې او امنیتي ځواکونو لخوا په وحشیانه ډول تر تهديد او تعقيب  لاندې دي. موږ د پاکستان له واکمنې ادارې وغوښتل چې ژر تر ژره د پښتون ژغورنې غورځنګ مشر منظور احمد پښتين له زندانه آزاد کړي. منظور احمد پښتون د پاکستان امنيتي ځواګونو د جنوري په 27 په پېښور کې بندي کړ.  دا پېښه وروسته له هغه رامنځته شوه  چې منظور پښتين  د جنوري په 12 د وزیرستان په بنو ښار کې یوې لویې غونډې ته وینا وکړه او  اراده یې څزګنده کړه چې غواړي د ټولو پښتنو سياسي مشرانو لويه جرګه راوبولي تر څو د پښتنو په راتلونکی برخليک فکر وکړي».

معلومه ده چې د پښتنو مشرانو د لويې جرګې د دعوت لپاره د منظور پښتين نيت، اسلام آباد په جدی اندېښنه کې اچولی دی. د سيمې له حالاتو څخه د باخبره سرچينو په قول «د پښتنو د سياسي مشرانو د لويې جرګې تريبيون کېدای شول د پاکستان د پوځي ادارې او امنيتې ارګانونو د رسوايي ميدان شي»؛ « منظور پښتون څرګنده کړه چې د لويې جرګې برخه وال بايد د پاکستان له ادارې وغواړي چې په افغانستان او همدارنګه د پاکستان په پښتونخوا  ايالت (پښتون مېشتو سيمو ) کې د ترورستانو له ملاتړه لاس واخلي. د منظور پښتين په وينا په افغانستان کې د تروريستي بريدونو، جنګ او بې ثباتۍ «کنترول پينل» او د ادارې مرکز په اسلام آباد کې دی  او په سيمه کې د ترورستانو فعاليت له اسلام آباده اداره کيږي».  د فبرورۍ د 2 نېتې د پراخو  غونډو برخه والو د پاکستان له امنیتي ځواکونو څخه د پي ټي ام د مشرانو له غوښتنو ملاتړ څرګند کړ چې غواړي د پښتنو پر وړاندې د تښتونې او له محکمې پرته ځورولو او زنداني کولو   اعمال ودروي: « منظور پشتین د هغه د نیولو څخه لږ دمخه په ښکاره ډول وویل چې د ورکو شويو پښتنو اوږد لیست نه دی کم شوی ، اسلام آباد  د پي ټي ام د بشري حقونو هیڅ یوه غوښتنه هم نه ده پوره کړې ، د پښتنو د فعالینو قاتلين ازاد ګرځي او نه محاکمه کيږي، او د پښتنو پر وړاندې ترهګري، ترور او استبدا ادامه لري».

د پي ټي ام سرچينې (ن .ګ) ته یادونه کوي چې  د منظور پښتين له نیول کیدو یوه ورځ وروسته، د جنورۍ په 28 ، د پښتون ژغورنې غورځنګ نور مشران محسن داوړ او علي وزیر په اسلام آباد کې د امنیتي ځواکونو لخوا ونیول شول. که څه هم هغوی ژر خوشې شول ، خو بیا هم ، پښتني فعالانو د پاکستان د استخباراتو دغه کړنې د ویرې اچونې او رواني تروريزم عمل وګاڼه: «موږ ټول يې په دې پوهه کړو چې که موږ د «ژوند د اساسي حق» په شمول د پښتنو د حقونو لپاره مبارزه جاري وساتو او انکار ونه کړو ، نو څه به پیښ شي».

د فبوري د دوهمې نېټې غونډو ته په کتو چې نه يوازې د روسيې په ښارونو، بلکې د نړۍ په يو شمير مهو مرکزونو کې تر سره شوې، داسې ښکاري چې د پښتنو د ملي نهضت فعالين نه تسليميدونکي دي.  د پرونيو سیاسي غونډو ، مظاهرو او لاریونونو برخه والو، نه یوازې د پښتون  ژغورنې غورځنګ له مشرانو سره خپل  پیوستون څرګند کړ ، بلکې  له نړیوالې ټولنې یې وغوښتل چې «د پاکستاني چارواکو ریښتیني څېره وپېژني ، د پاکستان د امنیتي ځواکونو لخوا د تروریستانو د ملاتړ او په دغه هيواد کې د بشري او مدني حقوقو د د پايمال مخه ونيسي».

د بېرغونو او شعارونو سره د پښتون ژغورنې غورځنگ غړو د خپل بندي شوي مشر لپاره د مالمو ښار په تريانگل کې لاريون وکړ. دغه گروپ چې د پښتنو د حقوقو تر لاسه کولو لپاره کار کوي.

يوه لويه ډله خلک د سې شنبې په ورځ د مالمو ښار په تريانگل کې ددې لپاره په لاريون راوتلي وه چې ددوي مشر منظور پښتين د پاکستان د پوليسو لخوا په بې بنسټه تور بندي کړای شوی دی. منظور پښتين د پي ټي ايم (پښتون ژغورنې غورځنگ) مشر دی، يو غورځنگ چې د پاکستان رياست بد اعمال د پښتنو پر وړاندې راسپړي. پښتانه په پاکستان، افغانستان او هندوستان کې مېشت دي.

منصور ترين د مالمو د لاريون ترتيب کوونکی وو. مونږ يو غورځنگ يو چې د انساني حقوقو لپاره کار کوو. زمونږ مشر په بې ځايه دلایلو او تور پورې کولو سره بندي کړای شوی دی. منصور ترين وايي: زمونږ د مشر گناه يواځې داده چې د پښتنو سره د ظلم پر وړاندې يې خپل غږ پورته کړی، مونږ د همدې بې عدالتۍ پر وړاندې د خپل غږ پورته کولو لپاره دلته راټول شوي يو. تر څو دغه مالومات تر نړېوالو ورسو.

د منظور پښتين نيولو سره د پاکستان هېواد په گڼو ښارونو کې لاريونونه وشول، په ځانگړې توگه د پاکستان په شمال لوېديځي برخه کې، هلته چې زياتره پښتانه مېشت دي. د افغانستان په زياتره ښارونو کې ددې کړنې پر وړاندې د لاريونونو سره سره د نوموړي هېواد اولسمشر هم پر خپل ټويټر خپل غبرگون ښکاره کړ.

My Östh Gustafsson

Sydsvenskan

MALMÖ28 januari 2020 16:48

کې نشر وه sydsvinskaدا پورته ليکنه په