ليکنه : امـــــيرګران 

وروسته له دريو کالو تبليغاتو او لابي گري د فلسطين او اسرائيلو د کړکيچ د حل لپاره د ټرمپ او بنيامين نتانياهو ترمنځ په سپينه ماڼۍ کي د ټرمپ د سولي طرح چي د ” پيړۍ معامله ” ئي نوم ورکړي اعلان شوه ، دا معامله د فلسطين د ځپل شوي ملت د برخليک لپاره يواځي د ټرمپ او نتانياهو په موجوديت او د بحران د اصلي لوري ياني فلسطينيانو په غياب کي سر ته ورسيده چي د فلسطين د خارجه چارو وزير د فلسطينيانو د ملي حاکميت نقض او د

” پيړۍ معامله ” ئي د پيړۍ توطــئـه وبلله ، ځني اروپائي  هيوادو ، عرب ليګ ، د اسلامي هيوادو کنفرانس ، په امريکا ، اروپا ، او په نوره نړۍ کي اکثريت مترقي او دموکراسۍ پلوه ګوندونو ، حقوقي او مدني بنسټونو او پارلماني غړو په کلکه رد او دا طرح ئي يوطرفه وبلله ، ځکه د بحران د اصلي اړخ چي هغه فلسطينيان دي په غياب کي اعلان شوي ، په تيرو لسيزو کي د فلسطين او اسرائيلو په منځ کي د سولي په توافقاتو کي به د امريکا جمهور رئيسان لکه جيمي کارتر د انورالسادات او ميناخيم بيگين ، بيل کلينټن د ياسرعرفات او اسحق رابين په منځ کي د منځــــګړي په حيث ولاړ ول ، ولي د ” پيړۍ معامله ” کي د کړکيچ اصلي لوري فلسطين په ځاي ډونالډ ټرمپ او بنيامين نتانياهو د بحران اصلي خواوي څرګنديدلي ، د ټرمپ د منځني ختيځ د سولي مکانيزم يا Deal of Century “پيړۍ معامله”

په حقيقت کي د اسرائيلو ترڅنګ  ، د فلسطين د يوه ازاد هيواد تشکيل ئي په يوه نه تعبيرسوي خوب بدل کړي د ټرمپ او نتانياهو په معامله او توطئه کي به فلسطين په څو جلا جلا برخو ويشل شوي وي او هغه به هم د اسرائيلو په کنټرول کي داسي پاتي وي چي هره برخه به ئي د اسرائيلو د هيواد او دولت لخوا محاصره شوي وي ، فلسطين به له اردن سره ګډه پوله نه لري او د اسرائيلو لخوا په جبر او زور ابادي شويو سيمو له لاري به اردن ته سفر کوي ، په دغه معامله کي هغه غيرقانوني ښارګوټي چي اسرائيلو د فلسطين په خاوره په زور او ظلم اباد کړي ، نه ړنګيږي ، فلسطين به نظامي ځواک او وســــــــله نه لري ، همداډول د ټرمپ په معامله کي د غــــزي تراړه چي د مديتراني د بحيري په څنګ کي موقعيت لري نه شي کولاي سمندري بندر ولري ، دوي کولاي شي د اسرائيلي بندرونو حيفا او اشدود څخه ګټه پورته کړي هغه هم د دوي تر څــار او نظارت لاندي ، د غزي تراړه به د فلسطين له ختيځ او د اردن د سيند له غربي څنډي ( west bank ) سره د يوه 36 کيلومتري تـــــونل له لاري چي له اسرائيلو به تيريږي وصل شي ، بيت المقدس ( يوروشليم ) به په متحدانه ډول د اسرائيلو پایتخت پاتي شي ، ټرمپ دوه کاله مخکي د امريکا سفارت هلته انتقال کړ ، د يادولو وړ ده چي د بحرين ، عمان او عربي متحده امارات استازو د ټرمپ ـ نتانياهو د (پيړۍ معامله) تائيد ولي توماس فريدمن امريکائي ژورناليست چي د اسرائيلو خواخوږي او طرفدار بلل کيږي په نيويارک ټايمز کي ليکلي چي دا طرح د دوو هغو منفورو شخصيتو يوه انحرافي طرحه ده چي پخپلو هيوادو کي مشکلات لري ، يو ئي د کانګريس او سنا د مجلس له استيضاح او بل ئي په اسرائيلو کي د مالي فساد له تحقيقاتو سره مخامخ دي ، د نوموړي طرحي پايله به دا شي چي په واقعي توګه به د فلسطين هيواد تشکيل ،

نه شي ، د فلسطين مظلوم ولس به د اوارګۍ او اشغال په شرايطو کي پاتي شي ، عربي وروڼه به ئي له اسرائيلو سره په عيش و نوش مصروف وي ، همدا ډول د اروپائي ټولني د بهرني سياست مسؤل جوزف بورل د اردن د خارجه چارو له وزير سره په يوه ملاقات کي وئيلي ( د منځني ختيځ په اړوند د ټرمپ د سولي طرحه ” د پيړۍ معامله ” له نړيوالو ستندردونو سره سر نه خوري او دا طرحه له نړيوالو اصولو سره په ټکر کي ده ، هغه زياتوي چي اروپائي ټولنه د اسرائيلو له لوري د فلسطين اشغال شوي سيمي په رسميت نه پيژني ، بورل زياتوي د منځني ختيځ لپاره د ټرمپ د سولي طرحه به ډيري هغه مؤلفي يا پاراميترونه چي د نړيوالو د توافق وړ ګرځيدلي له سخت ګواښ ــ

يا challenge سره مخامخ کړي ، د يادولو وړ ده چي که د منځني ختيځ لپاره د ټرمپ د 21 م پيړۍ د سولي طرحه د اسرائيلو تـشکيل ، د تيري ( 20 ) پيړۍ د بالفور له اعلاميي Balfour Declaration  سره مقايسه کړو په دواړو کي ياني د انګريز او امريکا لخوا د صهيونيستانو هژمونيستي پلان چي د پراخ او ستر اسرائيل Greater Israel

په محور راڅرخي گرين سيګنال ښودل شوي يواځي فرق ئي داده چي په منځني ختيځ کي د يهودو د دولت تأسيس يا د بالفـــور اعلاميه په 1917 م کي په 8 جملو چي 67 کليمي کيدي اعلان کړي ولي د ټرمپ د ” پيړۍ معامله ” له نقشو سره د 80 صفحو په شاوخوا کي توضيح شوه ، په دواړو ميکانيزمونو کي د ستراسرائيل د پراختيا ، د فلسطينيانو او نورو عربي هيوادو د ځمکو غصب او ترکنټرول لاندي راوستل ، د فلسطين د خلکو محکوميت او له خپلو روا او انساني حقوقو څخه ليري ساتل او هم اپارتايد شامل دي ، د سپيني ماڼي لخوا نوموړي طرحه په داسي مهال وړاندي کيږي چي د روان کال د مارچ په مياشت کي د اسرائيلو او د نوامبر په مياشت کي د امريکا د جمهوري رياست لپاره ټاکني ترسره کيږي چي احتمالآ له بنيامين نتانياهو او ډونالډ ټرمپ سره به مرسته وکړي ، د ټرمپ په طرحه کي په فلسطيني سيمو کي کومي يهودي ښارګوټي او مېني چي ابادي شوي دي هغه په رسميت پيږندل کيږي ولي د نړيوالو پريکړو او قانون له مخي دا ښارګوټي غيرقانوني دي که څه هم چي اسرائيل پري دعوا لري ، د ملګرو ملتو د امنيت شورا د خپلو مصوبو او پريکړو په رڼــــــا کي په کلکه غوښتنه کړي او تاکيدآ وائي چي هغه سيمي ، ښارګوټي لکه د ګولان لوړي څوکي ، د اردن د سيند غربي څنډه west bank ، بيت المقدس ( يوروشليم ) چي د اسرائيلو لخوا د 1967 او 1973 کلونو دجګړو په مهال ئي له عربو نيولي او هم اوس په وچ زور او جبر ښارګوټي جوړوي هغه د ټول تـــــخــلــيــه او له فلسطينيانو او ذيدخله اړخونو سره دي د مذاکراتو له لاري حل کړي ، د يادو جګړو په اړوند ځني محرم اسناد چي افشاء ( declassified ) شوي ، ( دمصر او اسرائيلو په 1973 جګړه کي چي د ” يوم کفر جګړه ” ئي بلله د جمال عبدالناصر زوم اشرف مروان د اسرائيلو استخباراتي سازمان موساد ته

د جګړي او نور ستراتيژيک راپورونه برابرول او نوموړي د ډبل ايجنټ په نوم پيږندل شوي ، هغه په 2007 م کال په لندن کي د اپارتمان د پنځم پــــوړ له تيراس څخه را لويدلي او په مرموز ډول مړ شوي ) ،

د منځني ختيځ لپاره د ” ګريټراسرائيل ” صهيونيستي پلان په هکله په کاناډا کي د اتاوا د پوهنتون د نړيوالو اقتصادي امورو او ګلوبلايزيشن پروفيسور او تحليل کوونکي ، پروفيسور ميشل شوسودوفسکي په خپل ليکچر کي ليکلي چي ( د ټرمپ د سولي طرحه ” Deal of Century ” د پراخ او ستر اسرائيل د نقشي مطابق ده ، دا طرحه د فلسطينيانو ټول انساني او طبيعي حقوق په خپلو سيمو ردوي او هم د اردن د سيند غربي څنډه ټوله له اسرائيلو سره ملحق او په دغه دره کي د غيرقانوني اباد شويو ميشتو يهوديانو او د ګولان د لوړو څوکو په رسميت پيږندل دي . ) د ګريټر اسرائيل نقشه لاندي ښودل کيږي ،

په پاي کي د يادولو وړ ده چي منځني ختيځ امريکا او نورو زبر ځواکونو ته ډير اهميت لري له ځکه هم په 2006 م کال د امريکا د خارجه چارو وزيري کوندوليزا رايس په تل ابيب کي دغي سيمي ته د New Middle East يا

نوي منځني ختيځ اصطلاح وکاروله چي د ګريټر ميډل ايست په پرتله د غرب لخوا وستايل شوه .

په اروپا کې د افغانستا د ملي ترقۍ ګوند شورا

د ۲۰۲۰ م کال د فبرورۍ ۳ مه

د ګوند د اروپا شورا مشر ( محمد اسماعیل غرني ) په نوښت د ګوند د بهرنیو یو شمیر شوراګانو استازو د ګوند د مشر  محترم عبدالحي مالک په ګډون سکایپي غونډه جوړه کړه . په سکایپي خبرو – اترو کې په لاندې موضوعاتو تود بحث وشو :

• د ګوند د راجستریشن او ګوندي ژوند یو شمیر مهمو مسألو په هکله .

• د افغانستان د ولسمشرۍ ټاکنو د وروستیو پایلو او د سولې روان بهیر د څرنګوالي په باب .

• د پښتون ژغورني یا پي ټي ایم مشر منظور پښتین د نیولو په وړاندې د نړیوال پراخ غبرګون د نتیجو په برخه کې .

غونډي ته محترم امیر محمد ګران چې پخوانی دیپلو مات او د سیمې د چارو وتلی څيړونکی دی ، د پاکستان د جوړېدو ، په نوموړي هېواد د پوځيانو د واک ټينګېدو ، له قومي لږکیو په تیره بیا پښتنو سره د مور او میري سلوک لرلو ، د پښتنو ،بلوڅو او سندیانو د حقوقو د وتلو مدافعانو د زورولو تري – تم کولو او وژلو ، له اسلام څخه د خپلو موخو په پار ناوړه ګټې کولو ، اسلامي بنسټپالنې او ترهګرۍ ته د ودې ورکولو او صادرولو ، د ترهګرۍ د تمویل په هدف د مخدره توکو تولیدولو او لیږدولو – د وسلو او انساني قاچاق د هڅونو ، په سیمه کې د خدایي خدمتګارو نه نیولي تر پښتون ژغورنې غورځنګ د جنبشونو د راټوکېدنې او ودې د اړتیا ، د عبدالصمد خان او نورو مشرانو شهیدانولو ، د غفارخان – ولې خان – محسن داوړ  – علي وزیر – منظور پښتین او نورو مشرانو زولانه او بندیانولو په څير مهمو مسألو په هکله ، غونډې ته ارزښتناک او  د پاملرنې وړ مالومات وړاندي کړل .

وروسته په نوبت د غونډې ټولو برخه والو په بحث کې فعال ګډون وکړ او هر یوه د ګوندي ژوندانه د لا ښه کولو ، د ولسمشرۍ د ټاکنو د نتجو د بې له ځنډه اعلانیدلو ، د سولې بهیر د کاواکه خواؤ د څېړلو او سمې سمت نیونې ته د هغې د راګرځولو ، د پښتون ژغورنې غورځنګ د ټوکېدلو اړتیا اهمیت او د غورځنګ د مشر منظور پښتین د غیر قانوني نیولو او زورولو په اړوند لاندې څرګندونې وکړي :

د ګوندي راجستریشن بهیر مخته تللی ، ګوندي مشرتابه د بهیر زیاتې مسألې حل کړي ، وړاندیز کیږي چې د ګوند د راجستر پيل شوي پروسه دې لا نوره هم چټکه او بشپړه شي .

په اروپا کې د ناروي او جرمنې ګوندي شوراګانې د فعالېدو په حال کې دي . وړاندیز کیږي چې په نورو هغو هېوادونو کې چې ګوندي شوراګانې کمزوري يا فعالي نه دي د ګوند د مشرتابه او د اروپا د ګوندي کادرونو په مرسته فعالې شي ، سازمانونه او ګوندي کمیټې يي ورغول شي او ګوندي ونډه او بسپنه یي راټوله شي .

د ولسمشرۍ ټاکنو د نتیجو د اعلان بهیر ډير وخت ونیو . داسې بریښي، چې څرګندې  کړۍ هغه د بحران خواته ټيله کوي ، ټاکنې د سولې د روان بهیر سره داسې تړل چې د ډموکراسۍ مرۍ خفه ، غیر ډموکراټيکو ډلو او عناصرو ته د ننګینې سا ایستو مجال ورکړي ، د افغانستان د خلکو په انساني حقوقو ستر ګزار دی . وړاندیز کیږي چې ګوند د اعلامیو خپرولو ، ګردي ميزونو جوړولو ، د نورو ډموکراسۍ پلوه ګوندونو ،نهادونو ، شخصیتونو سره د اړیکو ټينګولو او د هغوئ د هڅولو له لارې د ټاکنو پایلو د تالا – ترغه کېدو د مخنیوي لارې چارې ولټوي .

د سولي روان بهیر د افغانستان د یو شمیر ګاونډيانو ، نړیوال ځبر ځواکونو او د هېواد د یو شمیر جګړه غوښتونکو تنظيمي ، زورواکو او مفسدو کړیو د ناروا ګټو د بیلانس په یوه افغاني ضد سیالۍ اوښتی . مالومیږي چې لوبغاړي د افغانستان او ولس د ګټو پر ځاي خپلو ګټو ته ژمن دي . دا ډول چلند سوله نه شي راوستلی خو جګړه اوږدولی شي . وړاندیز کیږي چې ګوند په بهر او د هېواد دننه د ټولو لارو – چارو په کارولو سره د افغانستان خلک او نړیوال وهڅوي څو د داسې سولې له پاره کار وشي چې د افغانستان خلک او حکومت د سولې بهیر مهمه برخه وي . هسې سوله راشي چې د جګړې ټغر ټول او د یاغي هر خیل ډلو د مخنيوي زمینه برابره کړي . ګوند باید د خپلو خپرونو او نورو وسیلو پر مټ هغه کړۍ افشا کړي څوک چې خپلو او د اجنبې ګټو له پاره د سولې بهیر ، له پيچلتیاؤ سره مخامخ کوي .

د پښتون ژغورنې غورځنګ په سیمه کې د بې تاوه ټولنیز سیاسي جنبش او انقلاب په توګه اهمیت او اعتبار پيدا کړی . منظور پښتین د نوموړي غورځنګ د کرازماتیک مشر په څير سیمه ایز او نړیوال شهرت موندلی دی . د هغه په نوښت او مشرتابه د پښتونخوا ، پښتنو او نورو قومونو د تاریخ ډيرې سترې غونډې جوړې کړي ، د پښتنو د ډله ایزې وژنې او زورونې زیاتې سترې پوښتنې په همدې غونډو کې مطرح شوي . د لمړي ځل له پاره د پاکستان د پوځ او استخباراتو څېره د دغو غونډو له لارې برسیره شوي . د پوځ او استخباراتو مجازي غرور د همدغه غونډو په برکت په ځمکه راپریوت . پې ټې ام یا پښتون ژغورنه اوس په ټوله نړۍ او د پاکستان دننه کې د عدالت او حق غوښتنې یو معاصر غورځنګ پيژندل کیږي . که تېروتنه ونه شي دا غورځنګ به په نوي بڼه د شلمې پيړۍ د انقلابي غورځنګ داسې بدیل وړاندې کړي چې وینه تویونه به په کې ځاي ونه لري .

منظور پښتین پښتنو ته د پيښو مسألو یو نوملړ وړاندې کړی چې په عمده ډول د پښتنو او ستم لاندې قومونو د حقونو د تروړلو د مخنيوي او عدالت د تأمین پيغام له ځانه سره لیږدوي . پښتین هغه کړۍ په ګوته کړي چې حقوق تر پښو لاندې کوي او د قومونو طبیعي زیرمې د ځان په ګټه لوټوي . هغه د پاکستان دننه او له هغې څخه بهر تر ستم لاندې ولسونه اګاهانه بې تاوه مبارزې ته رابولې . له دې کبله تر دې دمه زموږ ګوند د پښتین د روان جدو جهد ملاتړ کړی او په دې بهانه چې هغه د خپلو خلکو له پاره حقوق او عدالت غواړي ، زندان ته اچول کیږي او وزورول کیږي ، د ملي ترقۍ ګوند له پاره هیڅکله د منلو نه ده .

وړاندیز کیږي چې له یوه پلوه د هېواد دننه او بهر ګوندي شورا ګانې د ګوند له خوا و هڅول شي چې په سیمه او نړۍ کې بشرپالې ټولنې ، شخصیتونه ، پارلمانونه ، حکومتونه ، د ملګرو ملتونو سازمان د پاکستان له مظالمو خبر کړي او له هغوئ هیله وکړي، چې د بې تاوه مبارزې سرلاری منظور پښتین بې له ځنډه خوشي کړي . له بلې خوا د افغانستان په عدالت او حق غوښتونکو ټولنو ، نهادونو او اړوندو دولتي ادارو غږ وکړي چې په یوه پياوړي همغږۍ د پيښې شوي ستونزې د عاجل حل له پاره ګډ کوښښونه وکړي .

په پاي کې د افغانستان د ترقۍ ملي ګوند رئيس عبدالحې مالک د اروپا د ګوندي شوراګانو او ګوندي مشرتابه ګډه سکایپي غونډه یو غوره نوښت وباله او د یو لړ نظریاتو په وړاندي کولو سره یي د غونډې برخه وال ډاډه کړل چې مطرح شوي وړاندیزونه به د ګوند د دارالانشأ سره شریک کړي او د ګوندي توان او واک په دائره کې به د وړاندې شوي پيشنهادونو د عملي حل د را اېستلو هڅو ته دوام ورکوي .

په درناوي

محمد اسماعیل غرنی

د ا م ت ګ د اروپا شورا رئيس